GISUGYOT sa National Wages and Productivity Commission (NWPC) sa Regional Tripartite Wages and Productivity Board (RTWPB) sa Central Visayas nga wagtangon ang P10 nga umento sa mga mamumuo nga nanarbaho sa gagmay nga mga kompaniya.
“Gusto nila P20, P15 lang. ‘Yun ang sina-suggest nila,” butyag ni Atty. Alvin Villamor, chairman sa RTWPB 7 sa pakighinabi sa Superbalita Cebu kagahapon.
Matod niya nga magtagbo sila og balik mga miyembro sa wage board sa sunod semana ug sabotan kon unsay aksyon nga himuon sa komento sa NWPC human nahibalik na ang wage order nga ilang giaprobahan niadtong Hunyo 11 ug giduso ngadto sa NWPC alang sa pagtugot niadtong Lunes.
Si Villamor, regional director sa Department of Labor and Employment (Dole) 7, nibutyag nga magtigom unta sila niadtong Miyerkules apan wa magka-quorum.
Sumala ni Jose Tomongha, representante sa labor sector sa RTWPB 7, nga tua sa Estados Unidos si Philip Tan, representante sa management sector sa wage board, hinungdan nga wa sila magka-quorum.
Ang sektor sa pamuo sa rehiyon dugay nang nangayo og usbaw tungod sa pagmahal sa mga palaliton. (SCG)