SECTIONS
Monday, September 24, 2018
SUPERBALITA DAVAO

Pagsul-ob og helmet sa mga motorista ipatuman sa Digos

NAGPAHIMANGNO ang mayor ning dakbayan sa Digos nga hugtanon nang ipatuman ang balaod sa “No helmet, no travel policy” alang sa tanang drayber og motorsiklo.

Gipabuhagay ni Mayor Joseph Peñas nga makigtagbo siya sa tanang lideres sa kabarangayan ug sa mga lideres sa nagkalain-laing mga sektor aron hisgutan ang pagpatuman sa “ helmet policy” sa tanang motorista nga moagi sa dakbayan.

“I will talk to the barangay captains, student leaders, to the leaders of the various sectors this month of July and by the month of August we will start the implementation of the ‘helmet policy’ in the City of Digos,” sulti ni Mayor Peñas.

Giklaro sa mayor nga dili kini usa ka balaudnon lamang sa dakbayan apan ipatuman kini subay sa nasudnong balaod sa Land Transportation Office (LTO).

Gumikan niini, gikinahanglan nga ang tanang drayber nga nagmaneho sa ilang motorsiklo nga moagi sa kadalanan sa Digos, magsul-ob gyud og helmet ug ang mosupak pagadakpon sa mga awtoridad sa dakbayan.

Dugang sa mayor nga daghan nang nahitabong aksidente nga nalambigit ang mga motorsiklo diin ang uban misampot sa pagkabaldado sa nagmaneho ug sa nag-angkas.

Ubay-ubay na sab ka mga kinabuhi ang nakalas tungod sa pagmaneho nga way helmet.

“We are always for the safety of the riding public, I hope they will cooperate as we should implement the law,” panapos niini. (Orlando B. Dinoy)


VIEW COMMENTS