SECTIONS
Monday, September 24, 2018
SUPERBALITA DAVAO

Kalabera napalgan sa NCCC Mall, kang kinsa?

KAPIN unom ka bulan human nasunog ang New City Commercial Center (NCCC) Mall of Davao nga mikalas og 38 ka mga kinabuhi, laing lawas sa tawo nga kalabera na ang napalgan niadtong Miyerkules sa buntag, Hulyo 11, samtang nagpadayon ang gihimong demolisyon.

Sa pamahayag sa NCCC Mall, gikanayon nga ang kalabera naungkat sa ika-tulong andana sa mall.

“Upon validating with the contractor, we immediately secured the area and informed the Inter-agency Task Force and Bureau of Fire regarding this matter. The Bureau of Fire (Protection), Philippine National Police, and Scene of the Crime Operatives were on site last night for proper investigation and transfer of the body to a safe place,” sumala sa pamahayag sa kompaniya.

Ang Davao Regional Crime Laboratory Office, nagkompirma sa impormasyon, ug nagkanayon nga ang kalabera naa naa sa Angel Funeral Homes alang sa otopsiya.

Sukad Huwebes sa buntag, Hulyo 12, mga awtoridad nagtutok “ensuring the proper identification of the body and preserving the dignity of the deceased.”

Niadtong Disyembre 23, 2017, dakung sunog miulbo tungod sa high-temperature electrical discharge sa ikatulong andana, nga milamoy sa mall, mikalas og 37 ka mga empleyado sa SSI Philippines, Inc. ug usa ka empleyado sa NCCC Mall Corp.

Sa taho niadtong Hunyo, si Local Government Secretary Eduardo Año nagsulti nga kinatibuk-ang 31 ka tawo mahimong mag-atubang og kasong kriminal o administratibo human sa insidente.

Matud ni Año nga sa wala pa ang insidente, daghang mga renobasyon sa mga andana sa mall ang gihimo, hinungdan sa pagkawala sa sprinkler systems sa ikatulo ug ikaupat nga andana hinungdan nga dali rang mikatap ang kalayo. (uban sa taho nila JPA, JCR/SunStar Davao)


VIEW COMMENTS