SUGDAN sa defending champions Sprockets 95 ug XUHS 2001 pagdepensa sa ilang titulo pag-abli sa mga dula sa Xavier University High School Alumni Basketball Association (XUHS-ABA) season 9 karong gabie sa XUHS Pueblo covered courts.
Sa unang dula sa court 1 sa alas-6:45 sa gabie, masulayan na sab sa reigning St. Peter Faber Cup champion batch 2001 ang ilang katakos sa maka-usab ning nga season.
Masangka sa 001ers ang magulang nga batch nga ang Alumni 2000.
Naangkon sa 001ers ang Faber Cup title human giparot nila ang Gamba 97 atol sa ilang best-of-three final niaging season.
Sa pikas korte, sulayan sa IAM 98 nga mabura ang ilang bati nga paghuman niagi nga season diin naa sila sa kataposang dapit sa Faber Cup elimination round.
Hapit pa nga dili makaapil ang kanhi ABA runner-up 98ers ning nga season, apan kalit lang nakaapas sa deadline.
Sugdan sab karon sa defending St. Francis Xavier champion Sprockets ang ilang kampanya sa bago nga season diin maatbang nila ang XUHS 1996 ni Ellich Alfante sa court 2 sa alas-8:15 sa gabie.
Naa lang gihapon ang higanteng center-forward nga si Paul “Shantao” Moreno ug ang saligandong guard nga si Jan-Jan Geroy nga mag-una alang sa Sprockets.
Masangka sa Wolves 07, ang St. Ignatius de Loyola Cup runner-up niagi, ang Batch 2003 sa court 1.
Dula karon, Hulyo 13, sa XUHS Pueblo covered courts:
6:45 p.m. court 1 2000 vs 2001
court 2 IAM 98 vs 2002
8:15 p.m. court 1 2003 vs 2007
court 2 1996 vs 1995