SI KANHI Misamis Oriental gobernor ug kanhi Cagayan de Oro Mayor Dongkoy Emano ang gitahasan ni Misamis Oriental Governor Yevgeny “Bambi” Vincente Emano nga maoy mangulo sa panel sa localized peace talk.
Gibutyag ni Bambi nga iya na gisulatan ang iyang amahan nga si Dongkoy nga gipaabot niini niadtong Hulyo 11 kabahin niini.
Miingon sab kini nga iyang amahan maoy consultant sa peace and order sa kagamhanang probinsyal.
Dugang niini nga iyang amahan ra usab ang magbout kon kinsa ang molangkob sa panel ug siguradong lakip niini ang nagkalain laing sector sa Non-Government Organization (NGOs), lakip relihiyosong grupo.
“Hopefully lakip atong mga igsuon sa walhong pundok,” dugang ni Bambi.
Kumpiyansa si Bambi nga dili mobalibad ang iyang amahan.
Gibutyag sab niini nga gikinahanglan gyod hisgotan ang kalinaw tungod kay ang kagubot dako og epekto sa iyang gipalambo nga turismo.
“I am very supportive with this administration but I am very worried everytime President Rodrigo Duterte fight with Joma Sison kay dako kaayog epekto sa akong tourism.”
Dugang sab sa gobernador nga dili usab niya isapayan kon sa pagkakaron dili pa andam ang administrasyon ni Duterte sa hisgotanang pangkalinaw.