LIMA ka mga ginikanan sa dakbayan sa Mandaue ang hayan mapasakaan og kasong child abandonment nga konektado sa child abuse human nga kanapulo na ma-rescue ilang mga menor de edad nga anak sa estriktong pagpatuman sa curfew ordinance sa dakbayan.
Matod ni Jessie Perez, pangulo sa City Social Welfare Services Office (CSWS), ang maong mga ginikanan gipaubos og imbestigasyon kon nganong kanunay nilang pasagdan ang ilang mga anak.
Kon mapamatud-an sa imbestigasyon nga kini nagpabaya sa ilang mga anak, ikiha sila sa CSWS.
Sukad Enero hangtod Hunyo 2018, di mominos sa 404 ka mga menor de edad nga kabataan ang na-rescue atol sa curfew ordinance.
Labing daghang natala niadtong Abril atol sa bakasyon gikan sa klase.
Atol sa estriktong pagpatuman sa Oplan Sita sa kapulisan sa milabayng buwan, natala sa CSWS nga moabot sa 65 ka mga menor ang na-rescue.
Sumala ni Perez nga gawas sa profiling sa kabataan ug pakig-istorya sa mga ginikanan kon ma-rescue ilang anak, ang mga ginikanan adunay pinirmahang kasabutan tali sa CSWS diin nisaad ang mga ginikanan nga di pasagdan ilang anak, bantayan aron di maglaroylaroy kon lawom na ang kagabhion aron sab nga di mabiktima o magamit sa mga nagkadaiyang krimen.
Apan nakita ni Perez nga way pagtagad niini ang mga ginikanan maong sila nakahukom nga pasakaan og kaso ang mga ginikanan aron masolusyunan ang maong problema. (JPP)