DI mominus sa 13 ka mga tinun-an sa high school sa usa ka tunghaan sa siyudad sa Danao ang gipangdala sa tambalanan human, matod pa, nanggahi ug naglisod pag-ginhawa nunot sa giingong nakit-an nila nga “black figure.”
Apan ang Provincial Health Office (PHO) niklaro nga mass hysteria ang nahitabo sa maong mga tinun-an.
Pasado alas 3:00 niadtong Huwebes sa hapon, nadangat sa emergency room sa Cebu Provincial Hospital (CPH) Danao ang mga tinun-an gikan sa Oblado Iway Memorial National High School sa bukirang Barangay Cambanay.
Si Provincial Health Officer Dr. Rene Catan, nga naa sa tambalanan dihang naabot ang mga pasyente, nihulagway nga puros sila mga babaye.
Sa nakita ni Catan, sama sa nagtanga, nahadlok ug nanggahi ang mga tinun-an.
Sa interview ni Catan sa tulo sa mga tinun-an, iyang nasayran nga may nakit-an sila nga itom nga talan-awon o black figure nga nagnganga ug nasuko kon nganong giguba ang iyang balay.
Gituohan nga ang gipasabot nga pinuy-anan sa ilang nakita, mao ang punoan sa kahoy nga dakit nga anaa sa ilang school campus. Giingong may duha ka dakit sa eskwelahan apan ang usa giputol ug ang dapit nga gituboan niini, mao na karon ang gibarugan sa classroom sa mga tinun-an.
Asoy sa mga bata, nagpakita kini diha sa ilang classroom, sa pansayan ug sa hallway, nga hinungdan sa ilang grabeng kahadlok.
Gipasabot ni Dr. Catan nga mass hysteria ang nahitabo. Napukaw ug nagtakod-takod ang kahadlok sa mga bata, dihang nibuto ang istorya kalabot sa gikahadlokan nga itom nga lalake, nga giingong anaa sa puno-an sa dakit.
Sa pagkakaron, anaa na sa stable nga kahimtang ang mga bata ug nakauli na sa ilang tagsa-tagsa ka mga pinuy-anan. (AZLG)