DUHA ka mga managlahing insidente sa dalan ang nahitabo niadtong Lunes diin ang biktima pulos anaa sa kritikal nga kondisyon.

Unang biktima mao si Emrick Mopar, 28, minyo, taga Barangay Talusan lungsod sa Balingasag, Misamis Oriental.

Nahitabo ang insidente niadtong Lunes mga alas 7:30 sa gabii dihang nagmaneho ang biktima sa iyang kaugalingon nga motorsiklo ug kalit nga gibanggaan sa usa ka van.

Nilagpot si Mopar gikan sa iyang motorsiklo ug maayong pagkabunal sa ulo niini sa semento hinungdan nga nigawas ang dugo sa biktima sa dalunggan nga bahin.

Ang driver sa van giingong nisibat human sa hitabo nga gituohang hubog nga nagmaneho.

Deretso na nga gidala sa Northern Mindanao Medical Center (NMMC) ning siyudad sa Cagayan de Oro ang biktima nga anaa sa kritikal nga kondisyon.

Ang kapolisan sa Balingasag Police Station padayon pa sa pagsunod sa kaso aron pag-ila sa van nga kalit nga mibangga niini.

Samtang naputol ang tudlo ni Benjamin Daculio, 22, ulitawo, taga Z-10, Bulua, ning siyudad human misangit ang gimanehong motorsiklo sa nakaparking nga van kagahapon mga alas 1:00 sa kadlawon.

Pauli na ang biktima sa panimalay niini dihang wala nabantayan nga adunay nakaparking nga van sa daplin sa kalsada hinungdan nga nisangit ang manibela sa gimanehong motorsiklo.

Maayong pagkaipit sa tudlo ni Daculio sa van hinungdan nga naputol gawas pa nga ubay-ubay nga bun-og sa lawas ang naangkon sa biktima human naligid ang motorsiklong gisakyan.

Gidala si Daculio sa susamang tambalanan ug padayon pa kining giatiman sa mga doktor ning panahona. (Stephanie V. Berganio)