GINAINGON nga di ka mabati sa usa ka tawo ang panghitabo sa iyang palibot kung di niya kini masuwayan. Mao nga kung wa makatilaw sa mga adunahan ang mapasmo tungod sa krisis, di gayud niya masabtan kon unsay bation sa gigutom. Kon wa masayri sa mga adunahang kongresista ang kakabus sa way yuta, dili gayud kini mohimo pg saktong balaod nga maapud-apod ang yuta o tinuod nga repormang agraryo.

Gani ang Enero 22 nahipatik na sa kasaysayan sa Pilipinas tungod sa mangilngig nga panghitabo sa pagpamusil sa mga mag-uumang nag-rally didto sa Mendiola haduol sa Malaca¤ang niadtong 1986. Busa gibati ko usab ang problema nga gibati sa yanong katawhan diha sa Mindanao Burn Center sa Davao Medical Center (DMC).

Ang akong anak nga 4 anyos na-admit sa maong buhatan tungod sa paso sa init nga tubig niadtong pista sa Sto. Niño. Tungod sa pagkadanghag sa mga hamtong nadisgrasya intawon ang bata.

Gidala namo siya sa San Pedro apan gi-refer kami sa Burn Center kay nag-specialize kini sa paso. Nasuta ko nga nag-inusara lang kini sa Mindanao ug dapat magpasigarbo kita nga may Burn Center dinhi.

Para kanako usa kini ka halangdon ug dalaygong programa sa panglawas sa atong gobyerno nga angayang sundon sa ubang LGUs ug suportahan nato.

Motambal kini sa mga grabeng paso o nasunog ug kung wala ko masayop, na-feature kini sa mga mantalaan ug TV sa nilabayng katuigan.

Dili ka daling makasulod dayon sa center tungod kay sterile ang maong lugar ug kinahanglan nimo'ng mosul-ob og gown, hair cap, nose cover ug gloves kung motabang ka nga moligo sa imong pasyente.

May usa ka kuwarto nga alang ra sa mga bata nga daw naa sa sulod sa nursery nga may libro, VCD ug mga drawings alang sa mga bata.

Apan may masaway sab ta sa operasyon kay sa akong tan-aw kulang na ang suporta niini ug dili na maayo ang maintenance sa maong center.

Hastang inita ang kuwarto tungod kay may usa ra ka electric fan alang sa dakong kuwarto. May usa pa ka kwarto nga naponder na ang suga ug matag gabii butangan na lang tawon og table lamp aron lang may gamayng kahayag. Kulang na lang nga magsindi og kandila ang mga pasyente sa sulod aron mangadye.

Halos tanang mga pasyente nga anaa sa sulod kay mga kabus ug dili taga Davao ug may mga pasyente nga sobra 5 ka bulan nang nagpuyo didto.

Gawas sa mga pasyente, luoy sab ang mga nagbantay. Wala silay saktong lugar nga kabutangan sa ilang mga gamit ug maghapin lang tawon og karton sa alley sa hospital sa pagkatulog. Usa ra gyud ka watcher ang puwede sa sulod.

May istorya pa nga nangawala ang gamit sa pasyente nga gibutang sa Stock Room kay abli, walay kandado ug walay guwardiya nga nagbantay sa ilang mga gamit.

Unta may daghang cabinet alang sa mga pasyente bisan sa gawas sa center ug gamayng kuwarto aron didto sila mangatulog inig ka gabii.

Unta paminawon kini sa administrasyon sa DMC.