Binukbukay sa Malaysia

MAKITA karong adlawa, Hulyo 15, kon kinsa ang nagsulti sa tinuod sa duha ka mga banggiitang boksidor sa kalibutan sa ilang panagharong sa ibabaw sa ring.

Sila si Senador Manny “Pacman” Pacquiao (59-7-2, 38KOs) ug kampeyon gikan sa Argentina nga si Lucas Martin “The Machine” Matthysse (39-4, 36 KOs) magbinukbukay karon sa gitawag og Fight of Champions didto sa Axiata Arena, Kuala Lumpur, Malaysia.

Pulos sulod sa welterweight limit sila Pacquiao ug Matthysse sa gihimong official weigh-in kagahapon nga nahitabo sa Malaysia International Trade and Exhibition Centre (Mitec), Kuala Lumpur.

Mitimbang si Pacman og 146 pounds samtang di sab sila layo kang Matthysse nga naa sa 146.7 pounds.

Gipamatud-an sa kampo sa kampeyon nga walay angay ikabalaka sa timbang ni Matthysse bisan giangkon niini nga sa nakalabay nga adlaw nga sobra ang kabug-at niini sa weight limit.

Sa bahin sab sa eight division world champion, naa sa fighting form ang iyang timbang ug andam na sa bukbukay.

Kon mahinumdoman nga sa dihang miaway si Pacquiao kang Jeff Horn ug kadtong kontra kang Floyd Mayweather Jr. naa sa 146 pounds sab kini.

Gilauman nga magdasok karon ang mga OFWs sa Axiata Arena sa Kuala Lumpur aron nga mosaksi sa away sa Pambansang Kamao. (uban sa taho bomboradyo.com)