MOLINGAW ug mopa-agik-ik nato ang bag-ong pelikula karong Hulyo 25 ang “Kusina Kings” nilang Zanjoe Marudo ug Empoy Marquez.
Dugay na diayng plano sa atong mga bida nga si Zanjoe ug Empoy nga mag-uban sa usa ka pelikula. Mao nga karon nalipay sila kay natuman na ang ilang gipangandoy.
Ang “Kusina Kings” maoy sunod nga offering sa Star Cinema human sa “I Love You Hater” nilang Julia Barretto, Joshua Garcia ug Kris Aquino.
Siguradong motumbling ta sa kaalegre sa pelikula nilang Empoy ug Zanjoe. Kauban sab nila si Natalie Hart, Chocoleit, Jason Gainza, Jun Sabayton, Maxine Medina ug Ryan Bang.
Sa pelikula mag-best friends si Zanjoe isip Ronnie ug si Empoy sa papel ni Benjie. Ang setting syempre kusina king gud ang title dapat lang sa restaurant mahitabo ang tanan.
Si Empoy ang maayo kaayong mangluto ug ikaduha ra si Zanjoe. Kinahanglang maninguha sila kay may pakontes nga mahitabo ug nakasagabay dinhi ang ilang restaurant business ug ang ilang panaghigalaay.
Pero adunay twist ang movie kay mahibaw-an nga ispiritu na lang diay dinhi ang Empoy kay na-comatose kini. Mao na ang sugilon sa direktor ining si Victor Villanueva atol sa gipahigayon nilang story conference.
Ang duha gitabangan usab sa mga expert sa kusina labi na mahitungod sa technicalities, preparation, safety ug pagluto mismo sa mga putahe nga lamian.
Dili gyud siguro ta magmahay sa pagtan-aw ani kay puno sa katawa. Si Empoy nabaid na og maayo sa komedi. Sama sa iyang teleserye karon nga “Since I found you,” diin ang mga hirit ni Empoy sa mga eksena maoy usa sa atong gi-atangan.
Kon si Zanjoe usab ang hisgutan dili lang sa drama kundi sa komedi swak na swak usab kini.
Mga lamiang putahe sa “Kusina Kings” atong atangan sa inyong mga paboritong sinehan, ay’g saba!