USA ka sakop sa Civilian Volunteer Organization (CVO) ang nagpusil sa iyang kaugalingon didto sa lungsod sa Matanao, Davao del Sur.

Ang naghikog giila sa kapulisan nga mao si Noel Pedroso, 42 anyos, minyo ug molupyo sa Barangay Kapoc sa lugar.

Nahitabo ang krimen mga alas 3:45 sa hapon, Enero 25, subay sa taho sa kapulisan.

Sa inisyal nga imbestigasyon ni Inspector Melgrace Driz, hepe sa kapulisan, gihimo sa biktima ang pagpusil sa iyang ulo samtang didto kini sa Sitio Botilon, Barangay Cabasagan sa dapit.

Sumala ni Driz, migamit ang biktima og kalibre .357. Gipusil niini ang kaugalingon tumong sa iyang ulo. Unang gitabang sa mga doktor ang biktima didto sa Medical Center of Digos apan wa magdugay nakahukom sila ibalhin kini sa Davao Medical Center tungod sa talandugong kahimtang.

Apan, sa pagsubay sa Sun. Star Superbalita ngadto ni Driz kagahapon sa buntag, gitaho niini nga nitaliwan na ang biktima ngadto sa laing kalibutan kay wa makasugakod sa gihimong operasyon.

Ang kapulisan nga niadto sa nahitaboan sa krimen nakarekober sa pusil nga gigamit sa biktima nga may sulod pang upat ka mga baseyong bala, uog usa ka baseyo nga anaa pa sa buka sa maong armas.

Nilutaw sa inisyal nga imbestigasyon sa kapulisan nga grabeng suliran sa iyang pamilya ang motibo sa CVO mao nga nagpusil kini sa iyang kaugalingon. (Orlando B. Dinoy)