USA ka lalaki mipatala sa kapulisan human siya gilabnihan sa wa mailhing suspek, samtang natulog sa usa ka bangko sa may palengke sa dakbayan sa Panabo.

Ang biktima mao si Vinio Aquino, 38, ug molupyo sa Purok 5, Barangay San Franciso, dakbayan sa Panabo.

Sa report gikan sa blotter sa Panabo City Police Station nasayran nga pasado alas 9:00 sa gabii niadtong Sabado nahitabo ang krimen.

Samtang natulog ang biktima sa usa ka kahoy nga bangko didto sa may bagsakan area sa nahisgutang dapit, kalit lamang nga gilabni sa wa mailhing suspek ang iyang Nokia nga cellphone.

Ang suspek dayong misibat padulong sa wa matinong lugar human makuha ang tuyo.

Samtang ang biktima midangop sab dayon sa kapulisan.

Mga pulis sa Panabo mihimo na karon og dugang pakisusi sa insidente.

Nagtuo ang mga otoridad nga mga badlungon sa maong dapit ang nanglabni sa cellphone sa biktima. (Marvin Pineda)