“PAKIT kang makatud a pamigalang karing balang metung:
Luguran mu ing pamikakapatad ding talapalsantaya,
mika-takut ka king Dyos, parangalan ya ing Ari.”
~1Pedru, Sunis 2:Verse 17
“Metung a bayung utus a babye ku: luguran la ring balang metung.
Nung makananu da kayung liguran,
makanyan mu naman a sukat yu lang luguran ding aliwa.
Kapamilatan niti ding sablang tau abalu da a talatuki da kayu,
nung luguran yu la ring balang metung.”
~John 13:34-35
“Ing ninu man sukat na lang igale
ring Banal a Lagyu ning Panginwan,
king mapakumbabang kabilyan ning isip;
damdam na lakwas yang mababa kesa karing are king dalan;
ninu man sukat yang mapanupaya kesa karing impun tanaman;
alang nanu mang pangsariling dangalan
at makadyang magkalub pamigalang karing aliwa
at e manenayang igalang da mu naman ding aliwa;
king kabilyan ning isip antini ninu man malyaring migale
karing Banal a Lagyu ning Panginwan parati.”
~Katlung Panalangin nang Ginung Goranga
(Third Prayer of Lord Gauranga)
***
Napus a gatpanapun ibat ku Menila at makasake kung bus pauli San Simun, ating sinake metung a lalaki at ikit ku atin yang tatalnan a libru.
Pepakilala yang Kristyanu kanung Pentecostal at metung ya kanung talapanalakaran ning Dyos Ibpa kapamilatan nang Yesu Kristo. Linakad lakad ya keng kilub ning bus at tinulid yang bagya kanaku.
Pepaganan ne ing portable sound system na at lapel mic at megumpisa neng migsalita.
Ing sabi na, mipala la kanu reng magkalub saup king misyun da at ning Apung Ginu. Apisip-isip ku, o tanu mong keng nanu mang sangkan e ka mekapamye kayang salapi karetang sobring pemaram na, o kasi e ka mipala, sabi ku keng isip ku.
Kitnan ke kabang magsalita ya dapot e na ku pekibatan keng kutang ku kaya nung kaninu na ibat ing panyabyan na dikil keng pangaligtas da reng ditak mu at pangasaldak da keng parusang alang-angga deng aliwang e memintu keng Dyos.
Nasa ku mu abalu nung kaninu na ibat ing panyabyan na. E naman itang amunan ke dikil keng Banal a Kasulatan uling e na ku man pantas kaniti. E na ku pinsingan at pekibatan nung e mu ing mabilis nang suglap kanaku at e ne pasibayung linawe kaybat na nita. Ikit ku ing atin yang mwa keng lupa na. Balamu dimdam na ing manamun kung makipagtaltalan kaya. E ku binalak ita.
Ing balu ku, sukat lang igalang—nung talasalpantaya ka—deng aliwa agyang talasalpantaya la o ali. Ipakit sukat king mabilug a yatu a kaluguran ta la ring kapatad tamu nanu man ing kapanwalan da o nanu man ing kuru-kuru da.
Ing pamigalang e makabate king nung ninu ing kayarap tamu. Mabandi at masalapi ya man o pakakalulu ya mu; matas ya pegaralan o mangmang ya; mayupaya ya o alipan yamu; maka-Dyos ya o agyang ali. Bakit? Kasi anak na katamu ngan ning Apung Ginu ninu man itamu.
Makanyan man, ing pamigalang e malyaring ipilit. Kusa iting babye. E uling makapiblas kang masanting at sasabyan mu Kristyanu ka, nung e na ka man mayap a pamakiyutus kareng aliwa, e sapat ing panenayan at asaan a igalang da ka anti king buri mung malyari.
E makagyu ing pari o pastor ka, cardinal ka o papa ka man; e makagyu ing punlalawigan ka o agyang punbangsa ka man, e malyaring deng memalen kabud da na kamu igalang nung ika e mu la gagawan ding sukat gawan bang ika magi kang kagalang-galang.
Ing pamigalang pagkalub, e pipilit.
***
Dake Talabaldugan:
1.dalisay/dalise² – (panguri) malino, malinis. English – limpid, clear. Alimbawa king pamangamit: “Dalise sabo ungut ing pangawa da keng aslam deng Ilukanu at iti mu naman ing masampat panulu karing mayna batu.”
2.dalisay/dalise³ – (panguri) busilak, basal. English – immaculate, chaste. Alimbawa king pamangamit: “Ing dalise danum ing malyaring iyampang keng Apu tamu uling antita ing buri Na.”
3.dalisdís¹ – (palagyu) gulud, gilid bunduk. English – slope of hill or mountain. Alimbawa king pamangamit: “Keng dalisdis da buri deng tupa uling dakal lang sasaup karin kabud la pa pakinabang uling dakal la.”
4.dalisdís² – (palagyu) libis, lusung, rundung. English – declivity, descent. Alimbawa king pamangamit: “Mengataluras la reng anak a mamyalungan king dalisdis inya menganabu la keng sapa keng gilid ning bunduk.”
5.dalít – (panguri) piyabe lawiwi at sunis. English – psalm, religious hymn, canticle, dithyrambical epic. Alimbawa king pamangamit: “Karing dina-dinalang dalit king Banal a Kasulatan mayayakit ing pamiparangal king ulaga ring Banal a Lagyu ning Panginwan..”
***
PAMANGAPAMPANGAN: Pamanyiklod at pamamapu mu naman kusang pagkalub da ring karapatdapat sisikloran at papapwan. E uling matwa ka, atin kang tungkulan o masalapi, mabandi o mayupaya ka at panayan mu na ing sikloran da ka at papau la keka ring baling akakatagmu mu.
E mu naman uling matwa n aka at asaan mu na ing papu la at siklod ding lakwas anak kesa keka. Ing pamanyiklod at pamamapu metung yang senayan at gawi tamung amana karing kekatamung pipumpunan at mandatila pa mu rin angga man ngening kasalungsungan.
***
PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan a misulat king pigmulan at tune kulitan kambe ning dalise at mapagmasabal a pamisip at parasan.
Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.