DUHA ka mga menor de edad ang gipasakaan og kasong rape with frustrated homicide human nila gilugos ug giluba ang onse anyos nga batang babaye niadtong Biyernes.
Ang pagpanglugos nahitabo sa alas 7:30 sa gabii niadtong Miyerkules sulod sa usa ka bakanteng bodega sa dalang Monteverde, siyudad sa Davao.
Gidemanda mao sila Michael, alyas Gamay, 16, nagpuyo sa New Bataan, Compostela Valley Province ug Jamal, alyas Albert, 16, nagpuyo sa Mini Forest, Barangay 23-C Poblacion, ning siyudad.
Ang duha gidemanda sa kapulisan pinaagi sa summary inquest procedure ug nakadoket ang kaso sa IS # XI-02-INQ-10-A-007 didto sa City Prosecution Office.
Sila maoy gitudlo nga milugos ug miluba sa biktima nga si Cyril (bansagon gitago sa Superbalita), 11, nagpuyo sa Buhangin.
Ang duha gisikop sa kapulisan nga sakop sa Sta. Ana Police Station sa alas 12:30 sa hapon niadtong Biyernes didto sa JP Laurel Avenue, ning siyudad.
Ang biktima, suma sa spot report sa kapulisan, nasiplatan sa usa sa mga empleyado sa Department of Trade and Industry nga natumba ug nabulit sa kaugalingong dugo duol sa Union Bank sa dalang Monteverde.
Ang maong empleyado nangayo og panabang sa security guard sa maong patigayon ug ang guwardiya na maoy nangayo og police assistance.
Nakuha sa dapit diin gilugos ang biktima ang usa ka lata sa vulcaseal nga gituohan nga gisimhot-simhot sa mga suspetsado samtang gihimo ang krimen.
Kritikal karon ang kahimtang sa biktima sulod sa Davao Medical Center samtang gikustodiya sa kapulisan ang mga suspetsado.
Ang duha ka suspetsado atua karon sa Lamdag for Boys sa dalang San Pedro gikustodiya samtang gipaabot ang sunod nga mando sa korte bahin sa ilang kaso. (AD)