WA na madala sa tambalanan ang usa ka habal-habal drayber human siya gipusil sa wa mailhing mamumuno sa alas 8:15 sa gabii niadtong Dominggo.
Ang insidente nahitabo samtang nagpaabot og pasahero ang biktima atubangan sa Jollibee didto sa Barangay Matina Crossing, siyudad sa Davao.
Si SPO4 Policarpio Ballenas sa Talomo Police Station nag-ila sa biktima nga mao si Leonelo Benidicto Jr., 32, minyo, nagpuyo sa Bangkal, Barangay Talomo Proper.
Matud ni Ballenas sa iyang spot report, ang biktima way kasayuran nga dunay tawo nga nagtinguha sa iyang kinabuhi samtang nagpaabot og pasahero atubangan sa Jollibee.
Mga nakasaksi nagbutyag nga kalit miabot ang mamumuno sa likod sa biktima samtang nagtindog tapad sa iyang motorsiklo.
Ang mamumuno giingon nga nagbitbit sa wa matino nga kalibre sa armas dayon gipusil ang biktima tumong sa iyang ulo.
Si Benidicto nakabsan dayon sa iyang kinabuhi ug patay na siya dihang miabot ang mga mirespondeng sakop sa Scene of the Crime Operatives (Soco).
Gilarawan ang mamumuno nga dunay gitas-on nga lima ka tiil ug unom ka pulgada, nagpangidaron og trayenta anyos ug kuluton ang buhok.
Sa pagsuwat ning balita, ang biktima gihaya na didto sa Collado Funeral Homes samtang ang kapulisan padayong nagsusi sa motibo sa maong krimen, sigun ni Ballenas.
Si Police Chief Inspector Joselito Loriza, hepe sa Talomo Police Station, nagmando sa iyang mga imbestigador nga ilang paningkamotan nga masayran ang motibo sa mamumuno.
Di lang sayron ang motibo sa krimen, apan ilhon kung kinsa ang mamumuno arong sikupon ug pasakaan og kaso ngadto sa korte. (AD)