BISAN hugot nga gipatuman sa kapulisan ang Comelec Gun Ban apan nakahimo gihapon og krimen ang usa ka wala mailhing mamumuno nga mipatay sa usa ka tricycle driver kagahapon sa kaadlawon dinhi sa siyudad sa Davao.

Ang insidente nahitabo sa alas 2:45 sa kaadlawon samtang naghigda ang biktima sa iyang tricycle ug nagpaabot og pasahero didto sa Sandawa, SIR New Matina, Barangay 76-A Bucana.

Si Senior Police Officer 1 Reynaldo Gustilo, duty investigator sa Talomo Police Station, nag-ila sa biktima nga mao si Ralph Villafuerte Tiu, 25, nagpuyo sa Blk. 5. Lot 15, SIR New Matina.

Matud ni Gustilo nga nagpaabot lamang ang biktima og pasahero niadtong higayona dihang giduol sa mamumuno ug didto gipusil sa makadaghan nga higayon hangtud nga namatay.

Ang biktima nakaangkon og mga samad sa ulo ug lawas nga miresulta sa iyang kamatayon mao nga wala na siya madala sa tambalanan sa mga mirespondeng sakop sa Central 911.

Mga nakasaksi sa maong hitabo nagbutyag sa kapulisan nga ang mamumuno nagpangidaron og 20 anyos, nagsul-ob og pula nga jacket, maong nga pantalon ug nagtabon og face towel sa iyang nawong.

Human milukapa ang biktima sa yuta, suma sa mga nakasaksi, nag-inusarang naglakaw ang mamumuno paingon ngadto sa wala masayri nga lugar.

Ang igsuon sa biktima nagbutyag sa kapulisan nga dunay mga nakaaway ang iyang igsuon sa ilang lugar ug posible nga bikil ang motibo sa mamumuno nganong gipatay ang biktima.

Mga sakop sa Scene of the Crime Operatives nga gipangulohan ni Senior Police Officer 1 Sherwin Balmores nakahipus og siyam ka baseyo sa bala sa .45 kalibre nga pistola.

Gipaningkamotan karon sa kapulisan nga makahipus og mahinungdanong impormasyon aron makahatag kanila og giya kung kinsa ang mipatay sa biktima.

Ang patay'ng lawas sa biktima atua karon gihaya sa Patalinghug Funeral Homes sa dalang Cabaguio, ning siyudad.

Sa laing bahin, usa ka magtiayon ang gitambalan karon sa Davao Medical Center human sila gipusil sa wala mailhing tawo didto sa Magpet, North Cotabato niadtong Lunes.

Mga biktima mao sila Rodrigo ug Rochelle Ybañez, hamtong ang pangidaron, nagpuyo sa Barangay Timpuran, Magpet.

Si Rodrigo naigo sa iyang ulo ug nawong samtang si Rochelle naigo sa iyang walang nawong dihang giluthang sila sa alas 6:00 sa gabii niadtong Lunes.

Ang magtiayon giingon nga nagluto og panihapon niadtong orasa. Ang insidente gipahibalo na ngadto sa kapulisan sa ilang lungsod. (AD)