IPAHILUNA si US-based Jose “Amang” Parica sa One Pocket Hall of Fame karong adlawa sa Indiana, USA.
Si Parica mao ang gikonsiderar nga naghatag og agianan sa Pinoyng mga bilyarista nga makahimo og dagkong pangalan sa Amerika sama na lang sa magkumparang sila si Efren “Bata” Reyes ug Francisco “Django” Bustamante.
Ang kalihukan giatol sa pagsugod sa 12th Annual Derby City Classic tournament sa Horse Shoe Casino Hotel diin lakip sa mga partisipante sila si Reyes ug Bustamante.
Sa wala pa manikat sila si Reyes ug Bustamante, si Parica, 61, nakapundar na sa iyang pangalan sa natad sa billiard sa tibuok kalibutan hilabi na sa Amerika.
Nailhan og sugod si Parica sa kalibutan sa billiard dihang mikampiyon siya sa World Open 9-Ball Child Cypress sa Lexington sa sayong bahin sa dekada 70.
Usa sa labing gikahadlukang magduduwa sa iyang panahon, si Parica nagsugod og duwa sa billiard sa edad nga siyete diin nakigparang na siya sa mas maguwang nga mga kontra sa bilyaran sa iyang amahan sa Blumentritt, Sta. Cruz, Manila.
Niadtong 1979, nahimong siyang national champion sa three-cushion, rotation ug snooker. Niadtong tuiga, iyang natukod ang Philippine Pocket Billiards Association diin siya maoy nahimong labing unang presidente sa asosasyon.
Niadtong 1988, gidominar niya ang Japanese circuit diin wala ka mga korona ang iyang nasakmit sulod sa siyam ka mga torneyo nga iyang gisalmutan.
Sa samang tuig, iyang gibuntog ang nagkakuyaw na nga s Reyes, 9-3, sa World Pro Tournament, ang labing dako nga torneyo niadtong panahuna.