Luzano: Panaglupos ti pilipinas…pudno kadi?

UMADANIN ti maikatlo nga State of the Nation Address (SONA) ni Pres. Duterte (July 23) banag a dumegdegdeg met dagiti kumanabtuog a kontrobersiya iti kagimongan. Imbes koma a gagar ken segga ti agari iti sapasap a pagilian, nagameran iti riper gapu kadagiti paspasamak a di napakpakadaan. Saggaysaentayo appomi tapno makulanitantayo a naimbag dagiti mabalin nga ibungana iti masungad nga aldaw:

***

Itay laeng nabiit, simngat ti baro a kontrobersiya gapu iti isyu ti “stupid God”. Adu ngamin ti limmugan nangruna kadagiti adda iti oposisyon. Mabalin a makuna a nakapuntosda tapno maaros nga agpababa ti respeto dagiti umili kenni Pres. Duterte. Kinapudnona, napaneknekan ti nakuna a negative reactions iti resulta ti kaudian a survey. Bimmaba ti satisfaction ratings ni Digong.

Natural nga agpalakpak dagiti grupo a kontra-Duterte. Kuna met dagiti managpanunot-praktikal (centrists) a mabalin a maabsuwelto ni Digong iti dayta nga isyu agsipud ta addaan kano daytoy iti nauneg a konsepto iti kinasiasino ti Diyos.

Ngem kunada, kasanom ngarud nga iyammo wenno ibinsa-binsa kadagiti sumurok 100 milyonen a Pinoy? No kasano a maisubli ti talek dagiti nasair iti isyu ti “stupid God”...ni laengen Pres. Duterte ti makaammo. Malagipko pay ti nakuna idi ti maysa a kandidato: aramid ti pakakitaan, saan laeng nga iti sao! Sapay koma.

***

Bimtak a kasla bomba ti kabarbaraanna pay laeng nga isyu iti nagbaetan da Pres. Duterte ken Vice President Leni Robredo.

Adda ngamin daplis ni Digong kontra kenni Leni panggep iti kina-presidente ti Pagilian. Tinagibassit kano ni Duterte ti kabaelan ti bise.

Banag a nakasairan met ti bise presidente. Malagip nga itay nabiit, adda kidag ni VP Leni kadagiti adda iti oposisyon wenno kadagiti kontra-administrasyon a rumbeng ti panagkaykaysa tapno marpuog ti talek dagiti umili iti panangtimon ni Digong iti layag ti pagilian iti agdama ken masakbayan. Mabalin a gapu iti dayta nga addang, nangrikna met ni Pres.

Duterte a nangiduron kenkuana tapno agkomento kontra Robredo – “never na magiging presidente si VP Leni dahil inutil”!

Kuna dagiti mangisaksakit kenni Leni a kasano nga agkuti ket barado met gapu ta eggem amin ti presidente dagiti resources ken pamkuatan agraman financial, manpower, ken aminen a makinarya ken serbisyo.

Ngem kugtar met dagiti pro-Duterte a husto laeng ti basnot ni Digong kontra VP Leni. Ngamin ammon ti kaadduan a kaadduan kadagiti nagkurangan ti gobyerno ket napasamak iti naglabas a rehime, saan nga iti agdama nga administrasyon. Sabagay, napasamak dagiti kontrobersiya kas koma iti isyu ti MRT, Dengvaxia, Mahindra, PDAP, DAP ken adu pay iti kallabes nga administrasyon. Manarimaan pay laeng ti panagdalus a naituka iti Duterte administration.

Agingga ita, dipay nalpas ti kontrobersia a Mamasapano masacre a nakatayan ti SAF-44. Panawen ti kallabes a rehime dayta, saan kadi?

***

Malagipko pay ti natagtaginepko a pimmapilan manen daydi lolok. Nakunana: saan aya a nakuna idi ni Ex-P-Noy nga iti tawen 2015 ket malpaston ti LRT extension manipud Baclaran agingga idiay Bacoor.

Ket no saan a mairingpas dayta a programa, agpaatalda kano iti tren kenni Mr. Jun Abaya. Nalpas kadi ti extension? Uray kano maysa nga poste, awan timmakder. Dayta kadi ti kari wenno buladas laeng? Imbag pay iti agdama a panawen, kunada....aggidgiddan ti sao ken aramid. He he...imbag laketdin ta naikalin daydi lolok...ta no saan, amangan ta iriingna manen ti saludsod: “apay a dida nagpaatal iti tren idi pimmalpak ti proyektoda iti LRT?” sabagay, masigurok a dipay nakalugan iti LRT wenno MRT ni lolok.

Agpatingga laeng daytoy iti “pasagad” ken “pattoki,” tay ngay guyoden ti nuang sakbay a nayanak dagiti “kuliglig.” Ti adal iti dayta a pannakibiang ni lolok iti tagtagainepko ket: “dika agsapata wenno agkari iti dimo kabaelan nga ipatungpal wenno aramiden!”

***

Subliantayo ti Sona inton July 23: mabalin a karaman dita dagiti paspasamak sipud pay timmugaw a presidente ni Pres. Duterte. Makaradikad dita ti nagappuanan ti Oplan Tokhang, Peace talks kadagiti rebelde nupay medyo pinnudot pay laeng, Train law a pagbalbalinen dagiti dadduma a padagsen kano ekonomya; Build, build, build program, nadoble a seuldo dagiti pulis ken soldado, problema iti pabalay, naibutaktak nga anomaly iti kustom, panagsukat iti sistema manipud Presidential nga agturong iti Federalismo, kapirpirma pay laeng a linteg kontra Hazing, isyu ti BBL ken adu pay a banag a mangipakita iti dakkel a nagluposan ti pagilian.

Ngem kangrunaan iti amin a mabalin a siripento dagiti umili ket ti suoten dagiti delegado iti dayta a pasken. Adda ngamin pammilin a masapul tay simple laeng ti aruatenda a saan ketdi a kas iti kallabes a pinnagarbuan a kasla addada iti fashion show wenno makisalip iti Miss Universe. Tsk tsk...mayat ta saan a rambak ti laonen ti Sona no di ketdi no ania ti mensahe ni Pres. Duterte para iti kallabes ken masakbayan iti akemna.

Maysanto kadagiti matagiuray a rekado ti SONA ket ti takderna iti isyu ti “transition leader” nga immunan a nakunana nga agkedked daytoy a kas agtugaw a “transition president” no maaprobaranen ti Federal Constitution.

Kas nakunana a rumbeng koma nga addanton Transition President a maipatugaw sakbay a masuktan ti porma ti gobyerno.

In short...kayatnan nga iyallawat ti akemna iti baro nga agtugaw a presidente. Dita a naipasagid ti akmento ni VP Leni Robredo a tinubngar met ni Digong.

***

Mano laengen nga aldaw, addaytan ti SONA. Ngem kasla umat-atiddog sa met appomi ti listaan dagiti maipatpatli a biag dagiti nangangato a turayen ditoy pagilian. Maibase iti report ti kapulisan, addan sangapulo a mayores ti napapatay.

Uppat kadakuada ti addaan pakainaigan iti droga. Kaadduan kadagita a krimen ket dipay nasolbar, nupay addan dua nga arestado a pammapatay kenni Nueva Ecija Mayor Bote. Dipay bimmaaw dagita a pasamak, nagsasaruno met ti ambush kadagiti bise mayor.

Ti kaudian ket ti pannakapapatay iti bise mayor ti Tawi-tawi. Adda met dagiti konsehal ti ili ken barangay officials ti napapatay. Ania ngata ti kayatna nga ipasimudaag dagita a pasamak, kailian? Adda payen managdanag ti nagkuna: amangan ta dagitanto ketdi ti pakaikugnalan ti pannakaideklara ti Martial Law iti sapasap a pagilian.

Nupay, kuna ti Palasyo a dinto mapasamak dayta...ditay maikkat iti panunot dagiti umili ti agsuspetsa ken agdanag gapu kadagiti agsasaruno a pammapatay. Sapay koma ta awanen ti mainayon pay kadagita a krimen sakbay iti Sona. Sapay koma met ta pudpudnon ti kunada a dakkelen ti nagluposan ti pagilian babaen kadagiti naaramidanen ni Pres. Duterte. Sapay koma. Adios mi amor, ciao, mabalos!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph