SI Nesthy Alcayde Petecio, kinsang nagsugod sa amateur boxing career sa Davao City, mipasaka na sab bandila sa Pilipinas human nakakuha og bulawan medalya sa iyang ikaupat nga sagunson nga titulo karong tuiga sa nahuman Second Kapolri Cup Boxing Tournament Open sa Manado, Indonesia.
Ang 26 anyos nga taga-Tuban, Sta. Cruz, Davao del Sur, midemolis kang Vietnamese Vuong Thi Vy pinaagi unanimous decision, 5-0, sa ilang women's featherweight 57 kilogram championship bout.
Tulo ka judges nga sila Rewthong Montire sa Thailand, Sasaki Yasutaka sa Japan ug Safrask Mohamed Thowfeek Mohamed sa Sri Lanka parehong miiskor og 30-27, nga pabor kang Petecio samtang ang laing duha sila Almohammedsalem Mihammed sa Kingdom of Saudi Arabia ug Nayak Rajesh Kumar mihatag sab sa iya og kadaugan sa parehong 29-28.
Si Petecio, sa Facebook interview sa Sun.Star Davao, niingon nga nakontra na niya si Vuong Thi Vy.
"Gihimo nila coach na magsulod ko sa iyaha permi kay taas sya sa akoa. Gamitan pud nako sya power kay mas kusog ko niya og kahit pano hadlok na sya sa akoa," ni Petecio, kinsang midaug sab sa 10th International Boxing Tournament sa Russia niadtong Mayo.
Mibulsa sab siya og titulo sa 1st Indian Open International Boxing Tournament sa Pebrero ug 35th International Felis Stamm Tournament for Elite Men and Women sa Warsaw, Poland sa Marso.
Ang kanhi World Aiba Women's silver medalist una gipildi ang Thai foe ug duha ka Indonesian una naka-atbang ang Vietnamese.
Matod niya, "Sa pang upat nako nga gold sobra kaayo ka blessed og happy kaayo ko sa akoa achievements sa pagkakaron pero kabalo ko nga kulang pana kay naa pay mas gipangandaman jud na namo ang Asian Games og world women's championship this year po." (MLSA)