KIDAPAWAN CITY -- Gipa-ilawom na sa State of Calamity ang lungsod sa Kabacan, North Cotabato nga giigo sa grabeng pagbaha.
Pito ka barangay sa Kabacan ang gilunupan sa baha gumikan sa kusog nga pag-ulan ug ang pag-awas sa Pulangi River.
Moabot sa 3,123 ka pamilya sa Kabacan ang naapektuhan sa baha ug mihikling paingon sa mga luwas nga dapit.
Kasagaran sa mga gibahang barangay kadtong anaa sa low-lying areas, ilabi na kadtong anaa sa kilid sa Pulangi River.
Gawas sa mga molupyo nga apektado sa kalamidad gibahaan sab ang ilang mga pananom ug kahayupan.
Giklaro ni Kabacan Mayor Herlo Guzman Jr., nga ang calamity fund deritso nga gamiton alang sa mga barangay nga grabeng naapektuhan sa baha.
Apan una na nga nang-apud-apod og hinabang ang Department of Social Welfare and Development (DSWD)-Cotabato sa mga bakwit sa baha.
Gisusi na sab sa mga sakop sa Kabacan Municipal Disaster Risk Reduction and Management Office, ang kinatibuk-ang danyos sa maong pagbaha.