NAGPORMA og team si Davao City Mayor Sara Duterte-Carpio alang sa Waste-To-Energy (WTE) projects nga maoy motan-aw sa pagpadagan sa pasilidad niini sa Davao City.
Tungod niini, mi-isyu ang Mayor og usa ka Executive Order No. 18 sa pagmugna sa Project Management Team (PMT), nga gilangkuban ni Assistant City Administrator for Administration Lawyer Tristan Dwight Domingo isip Project Manager ug Engineer Elisa Madrazo isip Assistant Project Manager diin ang ubang opisyal sa dakbayan, miyembro sab sa team.
Ang WTE project usa ka hiniusang tinguha tali Pilipinas ug gobyerno sa nasud Japan uban ang Davao City nga nahimong recipient, diin sa di madugay matukod na ang WTE facility.
Ang dakbayan gi-ila human nadawat ang ilang plano ngadto sa National Economic Development Agency-Davao Region diin sila mi-apply sa posible nga Japanese grant alang sa katukuran sa maong pasilidad.
Gitukmod sa Japan International Cooperation Agency (JICA) ang maong teknolohiya gikan sa ilang pagtuon sa Japanese waste management technologies nga gihimo tuig 2015 ngadto 2016, nga migawas sa maayong resulta.
Niadtong Marso 20, ang Japanese ug Philippine Government milagda og usa ka Exchange of Notes, diin ang kanhi ¥5,013 bilyon maoy ipondo sa implementasyon sa maong proyekto sa Davao City.
“As of the moment, the Japanese Government is waiting for the signing of the Agent Agreement between the Japanese Government and the Department of Finance (DOF),” ingon ni Domingo.
Dugang pa, “As soon as it is signed, Crown Agents, which is the designated Japanese procurement agent, will work with the DOF and the PMT to finalize the selection of the legal, financial and technical consultants to be hired to help implement the project. Thereafter, another selection or bidding process for a qualified entity who shall be responsible for the design, construction, operation and maintenance of the WTE facility to be built will be made,” niya pa.
Ang Solid Waste Management maoy usa sa mga napulo ka priority agenda ni Mayor Sara diin nagtumong nga matubag ang kakulangon sa hisgutanang sustainable waste management sa dakbayan.
Sa miaging tuig, si Mayor Inday personal nga mibisita sa Japan aron masinati ug makita ang Waste-To-Energy facility didto sa Kitakyushu City. (Jeepy P. Compio/CIO)