PATAY ang drayber sa sedan nga kotse samtang pito ang samaran human madisgrasya ang tulo ka sakyanan lakip na usa ka ambulansya kaadlawon sa Dominggo, Hulyo 15, didto sa Carlos P. Garcia Highway, sa Buhangin underpass, Buhangin District, Davao City.
Gideklarang dead on arrival sa Southern Philippines Medical Center (SPMC) si Decerio Durias Relacion, drayber sa Hyundai Accent Sedan nga adunay plaka numero MR-6808, residente sa San Roque, Malalag, Davao del Sur.
Samaran mao sila Jessa Mae Ceriales, 30; ug Rhodalle Andila, 31, pulos taga Buhangin; Elona Jane Domogan, 26, taga Digos City; ug Eva Alicaway, 27, nagpuyo sa lungsod sa Cateel, Davao Oriental.
Laing angol mao sila Frank Dulpina, 33, residente sa Purok Nueva, Surigao City. Si Dulpina pasahero sa Toyota Hi-Ace ambulance nga adunay plaka numero KGU-281 nga gimaneho ni Ranolfo Mediano, taga Sta. Cruz, Davao del Sur.
Nadamay sab sa disgrasya ang Toyota Innova multi-purpose vehicle nga adunay plaka LJH-437 nga gipanag-iyahan ni Shariff Madzmir Hasim, taga Guiwan, Zamboanga City, nga gimaneho ni Alexander I. Villarube Jr. taga Agdao, Davao City.
Sumala sa report sa Davao City Police Office (DCPO) nasuta nga ang multi-purpose vehicle nagdagan nga gisundan sa Sedan vehicle ug sa ambulansya.
Sa inisyal nga imbestigasyon sa traffic section sa Buhangin Police Station nasayran nga ang drayber sa Sedan mikawat og linya sa multi-purpose vehicle diin wa na niini mabawi dihang pasugat sab diay ang ambulansya.
Sa kakusog sa impak, namatay ang drayber sa Sedan samtang ang mga angol anaa sa SPMC.