NIPULI sa iyang anak ang usa ka inahan pagpamaligya og shabu human nga kini nasikop sa susama nga kasong pagpamaligya sa ilegal nga druga dinhi siyudad sa Cagayan de Oro.
Tiklo si Noronisah Regaro, 46, biyuda, taga Zone 6, Balite, Barangay Bugo ning siyudad apan lumad nga taga Wao, Lanao del Sur.
Nasikop si Regaro niadtong Hulyo 13, 2018 sa gabii sa Barangay Bugo sa operasyon sa City Drug Enforcement Unit (CDEU).
Sa pakighinabi sa Sun.Star Superbalita kang SPO2 Allan Radaza, sa CDEU gibutyag niini nga napalitan ang suspek sa ginadili nga druga gamit ang P1000.
Matud ni Radaza nga gikumpirma sa inahan nga siya ang nipuli pagpamaligya og ginadili nga druga huma napriso ang iyang anak niadtong niaging tuig.
Nakuha gikan sa posesiyon sa suspek ang mokabat P91 mil nga kantidad sa gituohang.
Gituohan nga dili lamang sa siyudad mamaligya ang suspek kay gikan man kini sa Wao ug gahapit kini kung aduna’y mga kustomer diha sa Gingoog ug uban pa nga dapit sa Misamis Oriental.
Ang suspek ang kasamtangang anaa na sa Maharlika Detention Cell (MDC) ug gitakdang ipasaka ang kaso karong Hulyo 16, 2018 adlaw nga Lunes.