GILANGKAT ni Jhack Tepora ang titulo sa WBA Interim World Featherweight human iyang gipalukapa sa ika-9 nga round si Edivaldo Ortega sa nasod sa Mexico isip undercard sa Pacquiao-Matthysse.
Usa ka kusog nga right uppercut ang nakabungog ni Ortega nga maoy hinungdan sa iyang pagkatikangkang ug giiphan siya sa referree.
Nakabangon pa si Ortega ug nakalahutay hangtod sa himatayon nga segundos sa 9th round apan iya nang gikaligo ang kumo ni Tepora nga niresutla sa pagkaguba sa iyang nawong hinungdan nga gihunong sa referee ang away.
Gikan pagsugod sa first round, nagbinayloay na og mga suntok ang duha ka boksidor apan tataw ng lupig sa pasudlanay sa kumo ang Mexicano.
Si Tepora maoy ikaduhang Pilipino nga nilangkat og world title sa niaging tulo sa ka adlaw human usab gilabni ni Vic Saludar ang WBO minimumweight title didto sa Japan niadtong Biyernes human iyang gipukan si Ryura Yamanaka.
Ang interim champion sa WBA Interim World Featherweight adunay limpyo nga professional boxing record nga 22-0, 17 knockouts samtang si Ortega nahagsa ngadto sa 26-2-1, 12 KO.
Samtang nidaog usab ang laing tulo ka Pilipino nga silang Jayar Inson, Vincent Astolabio ug Juan Miguel Elorde nga maoy nakahatag usab og dugang inspirasyon sa mga lumad. (PAC)