BIG time drug pusher sa dakbayan sa Mandaue nasignit sa Mandaue City Police Office (MCPO) kagahapon sa hapon atol sa ilang gihimong buy-bust operation.

Ngan sa suspek nitumaw na sa laing operasyon sa kapulisan sa dakbayan sa Sugbo.

Click here for stories and updates on the Sinulog 2010 Festival.

Gibana-bana nga mokabat sa P400,000 ang kantidad sa drugas nga nakuha gikan sa suspek nga si Mila Macabatu.

Ang hepe sa MCPO nga si P/SSupt. Noel Gillamac niingon nga si Macabatu nga usa ka Maranao tribe, taga-barangay Mantuyong, dakbayan sa Mandaue, bigtime pusher.

Gihulagway ni Gillamac nga anaa na sa ilang talaan si Macabatu nga level 2 drug pusher.

Si Macabatu nakuhaan og lima ka bulto nga gituohan nga adunay sud nga shabu ug usa ka dakong plastic nga gibana-bana nga adunay gibug-aton nga 50 gramos diha sa posisyon.

Ila kining nakuha sa pagronda sa gipuy-an sa suspek.

Nagduda si Gillamac nga sakop sa sindikato si Macabatu ilabi nga nilig-on ang ilang pagtuo nga nalambigit sa pagpamaligya sa ginadiling drugas sa dihang nakadawat silag impormasyon sa Cebu City Police Office (CCPO) kalabot sa pagkatawo sa dinakpan.

Nipasabot si Gillamac nga sa miaging tuig ang CCPO adunay nasikop nga tigpayuhot og shabu.

Atol sa gihimong tactical interrogation sa ilang dinakpan gihinganlan niini si Macabatu nga usa sa mga source.

Tuod man sa gihimong buy-bust operation kagahapon niguwa nga positibo sa dihang nagdala og shabu ang dinakpan nga gisud og gamay nga pouch bag aron ibaligya.

Atol niining pagsuwat ang dinakpan gidala sa CCPO alang sa laing tactical interrogation ingon man ang pag turn-over sa mga ebidensiya ngadto sa PNP Crime Laboratory. (FVQ)