SUGOD karong adlawa, hingusgan sa kapulisan sa lungsod sa Poro, isla sa Camotes, ang pagpatuman sa mga ordinansa bahin sa pagpasul-ob sa mga motorista ug angkas niini og helmet, pagdili sa saba nga mga tambutso ug speed limit sa mga sakyanan.
Gipahibawo ni P/SInsp. Roger Quijano, hepe sa Poro Police Station, nga lima na ka tuig nga napalabang ang maong mga ordinansa, apan wa kini hingpit nga mapatuman.
Siya nibanabana nga 10 ka tawo ang nangamatay ug nangaangol sa ilang lungsod gumikan sa aksidente sa motorsiklo diin ang uban wa magsul-ob og helmet.
Iyang nakita nga duna usab mga menor-de-edad ang momaneho og mga motorsiklo.
Ubos sa Municipal Ordinance No. 01-s-2013, nalatid ang mga lagda ug regulasyon alang sa pagpasul-ob og helmet sa mga drayber og motorsiklo ug mga angkas subay sa gitakda sa Republic Act 10054 kun Motorcycle Helmet Law.
Sa maong ordinansa, ang makalapas niini kay pamultahon og P300 sa unang paglapas, P500 sa ikaduhang paglapas, P1,000 sa ikatulong paglapas ug sakmiton ang lisensiya sa ikaupat nga paglapas.
Samtang ubos sa Municipal Ordinance No. 03-s-2013 nga gi-enact sa Sangguniang Bayan sa Poro niadtong Pebrero 25, 2013, gitakda ang 10 kilometros matag oras ngadto sa 20kph nga speed limit sa tanang mga klase sa sakyanan nga magdagan sa kadalanan gikan sa Boga sa Barangay Western Poblacion ngadto sa Potat sa Barangay Eastern Poblacion.
Gipasukip usab sa mga probisyon sa maong ordinansa ang pagdili sa paggamit og bora-bora o ang saba nga tambutso sa mga motorsiklo nga makadisturbo sa publiko ug ang pagpasakay og mga bata sa backseat nga ang tiil dili makaabot sa tumbanan.
Ang makalapas sa Municipal Ordinance No. 03-s-2013 kay pamultahon og P300 sa unang paglapas, P500 sa ikaduhang paglapas ug P1,000 ug usa ka adlaw nga impound sa sakyanan sa Poro Police Station.
Gipaambit ni Quijano nga nabantayan niya nga daghang mga magmotorsiklo ang dili maggamit og helmet labi na mga menor-de-edad tungod kay naa ra sa isla.
Samtang nakadawat usab sila og daghang reklamo sa kasaba sa ubang mga motorsiklo nga naggamit og bora-bora.
Gibutyag ni Quijano nga kon duna sila’y makit-an nga wala mag-helmet, naay saba nga bora-bora ug nilapas sa speed limit atol sa mga checkpoint ug pagpatrolya sa iyang mga sakop, ila kining sitahon ug dakpon, temporaryo nga i-impound ang sakyanan o motor ug pabayron sa munisipyo sa gitakda nga multa sa dili pa ipagawas ang sakyanan o motor gikan sa police station.
“As part sa pag-drive og motor, naa jud kay helmet asta imong angkas maski dili gyud katong naa sa Helmet Law, ma-consider nato, basta naa lang gyud helmet sa ilang ulo para sa ilang proteksyon,”
dugang ni Quijano sa Superbalita Cebu kagahapon. (SCG)