NEGUSYANTENG si Efrain Pelaez buot makig-alayon sa administrasyong Radaza sa dakbayan sa Lapu-Lapu aron sa paghilot sa kasungian sa pagbutang og public transport terminal sa barangay Pusok.
Si Pelaez makig-atbang sa administrasyon taliwa sa iyang tinguha nga magpapili pagka-mayor sa Partido Liberal atbang kang first lady Paz Radaza sa Lakas-Kampi CMD.
“We are always willing to solve the problem (traffic),” nagkanayon si Pelaez nga nahinabi sa Sun.Star Superbalita.
Apan gikuwestiyon ni Pelaez ang gipatawag nga tigom sa City Hall niadtong miaging semana ang gi-propose ngadto sa kadagkuan sa Mactan Export Zone (MEZ) nga mobutang og Public Transport Terminal.
Kay hayan maapektuhan ang establisemento nga gipanag-iya ni Pelaez nga mao ang Marina Mall nga angay tukoran ang luyo nga bahin sa edipisyo ug terminal aron pag-cater sa mga kawani ug customer sa Marinal Mall.
“These people (City Traffic Board) are sensible. They could have invited me aron maka-explain sa akong side,” dason ni Pelaez.
Nipasabot ang negusyante nga atol sa administrasyon ni kanhi mayor Ernest Weigel Jr. adunay kaugalingong terminal ang Marina Mall sud sa lima ka mga tuig.
Apan gipaundang ang terminal atol sa paglingkod ni Radaza.
Nasayran nga nagtinguha sa pag-abang si Peleaz og bakante nga luna sa Peza nga nahimutang atbang sa Marina Mall alang sa tukoron nga terminal ug extension sa mall.
Apan wa kini mahinayon sa dihang ang higala ni Radaza maoy gihatagan og pabor sa pag-abang sa maong luna. (FVQ)