SULTAN KUDARAT -- Patay ang usa ka pulis human girakrakan alas 8:35 sa buntag niadtong Dominggo sa siyudad sa Tacurong.
Giila ang biktima nga si Senior Police Officer 1 Rolly Kamid, 51, nadestino sa Lambayong Municipal Police Station (MPS) ug molupyo sa Barangay Poblacion, Isulan, Sultan Kudarat.
Gibutyag ni Senior Superintendent James Gulmatico, Sultan Kudarat Police Provincial Office director, nga sakay ang pulis sa iyang motorsiklo gikan sa Lambayong MPS, pauli sa ilang balay.
Apan pag-abot niya sa Purok Rose, Barangay San Rafael sa nahisgutang siyudad kalit mibutho ang duha ka wala mailhing lalaki ug gipusil siya.
Patay gilayon si Kamid nga naigo sa ulo ug likod nga bahin sa lawas samtang mga mamumuno daling miikyas sakay sa laing motor paingon sa hilit nga dapit sa Tacurong City.
Gikompirma sa pamilya ni Kamid nga sa wala pa ang hitabo, nakasulti pa kini ngadto kanila nga dunay hulga sa iyang kinabuhi gumikan sa gilusad nga hugtanon nga kampanya sa Lambayong MPS batok sa gidiling druga.
Kapulisan sa Tacurong City nga gipangulohan ni Superintendent Jeofel Siason padayon nga nag-imbestiga sa pagpamusil patay sa pulis. (Edgar E. Fuerzas)