SUKAD milungkod sa Malacanang si Presidenti Rodrigo Duterte duna nay 186 ka mga lokal opisyal – gobernador o mayor – ang gisakmitan sa ilang gahom sa paggamit sa kapolisan, nagpasabot dili na nila ubos sa superbisyon ang PNP sa ilang probinsiya o siyudad o munisipyo.
Ang hinungdan, matod sa DILG mao nga nalambigit kining mga opisyal sa nagkadaiyang illegal nga kalihukan sama sa drugas, pakyas sa pagsumpo sa terorismo sa ilang hurisdiksiyon o nagsuporta sa mga grupong terorista.
Wala hinuon hinganli sa DILG kinsa kining mga opisyal apan ang walo niini mga gobernador ang uban mayor sa siyudad o munisipyo.
Opisyal gihapon sila sa ilang probinsiya o siyudad apan dili na sila makadumala pa sa kapolisan. Ang kadagkoan na mismo sa PNP maoy naghupot sa katungdanan ug operasiyon sa kapolisan.
Gawas niana, dunay 156 ka mga local nga opisyal ang gipalagpot o gisuspenso sa ilang katungdanan tungod sa nagkadaiyang kaso sama sa grave misconduct, dishonesty, neglect of duty, ug conduct prejudicial to the best interest of the service, ingon man abuse of authority.
Karon lang sa pamunoan ni Duterte nga daghang mga lokal nga opisyal ang gipang-alig-ig ug napalgang dili takos sa ilang pangatungdanan tungod sa mga kalambigitan nila sa nagkadaiyang kahiwian.
Wala kini mahitabo sa probisya ug mga siyudad lang, mismo sa palibot ni Duterte sa Malacanang nasinati usab kining pagpalagpot sa katungdanan niadtong mga “hiwi” ug “tulibagbag” nga mga opisyal.
Usa ra ang dakong mensahi niini, ginuntan ni Duterte iyang saad sa kampaniya nga limpiyohan niya ang gobiyerno gikan niining mga ‘daotang’ namunoan ug nagpatuong sulogoan sa lungsoranon.
Apan, bisan pa sa maong kampaniya dunay gihapoy mga report sa pangabuso sa gobiyerno ug kining naghimo sa ingon wala gihapon magtul-id sa ilang pangatungdanan.
Sa miaging semana ug bulan, dunay mga opisyal sa gobiyerno – mayor, bise mayor, konsehal o bisan opisyal sa barangay – ang gipangpatay. Ug taliwa niining tanan, nagpabilin gihapon ang problema sa atong palibot.
Busa, makaingon ta unsa man gyuy lintunganay sa kampaniya ni Duterte paglimpyo sa gobiyerno. Gihimo na niya ang angay buhaton ug gipatuman na niya ang angay himuon aron mahipos kining mga kunot sa gobiyerno.
Nagtuo gihapon ta nga ang katilingban o lungsoranon duna dakong papel sa kausaban sa sistema sa gobiyerno. Bisan pa kon mangugat pag-ayo si Duterte sa iyang programa batok sa korapsiyon, mga pangabuso o drugas, apan kon mismo ang katawhan manampiling lang dili ta makapaabot og milagro.
Kining gidaghanon sa mga lokal nga opisyal nga nalambigit sa nagkadaiyang tinunto modaghan pa kini kon magpabiling manguyogpos ang katawhan. Gikinahanglan gyud atong partisipasiyon sa paglambigit sa kampaniya batok sa kahiwian sa gobiyerno.
Matod sa DILG epektibo kaayo ang hotline nga 888. Daghang mga reklamo batok sa mga opisyal ang gipadangat pinaagi sa maong linya. Ug kining mga reklamo giimbstigahan gilayon ug nangatumbok kadtong mga abusadong opisyal sa gobiyerno.
Kon duna tay mamatikdang salawayon diha sa City Hall o Kapitolyo, gamiton nato kining hotline 888 sa pagbulgar sa maong kahiwian. Dili ta magpanuko sa pagtug-an sa tinuod, kana, kon makaayo sa kinatibuk-ang katawhan sa atong dapit.