NIABOT na og 33 ka tuig sukad sa mabangis nga panghitabo kaniadtong Hulyo 11, 1985 dihang gidagit sa mga armadong tawo sa diktaduryang Marcos si Fr. Rudy Romano. Kuyog niyang gidagit niadtong adlaw mao si Levi Ybañex.
Nalipay ko kay gawas nga dunay kalihokan paghinumdom kaniya ang pipila ka grupo dinhi sa Sugbo, naa sab diay commemorative mass nga gipahigayon sa Syudad sa Tacloban.
Dinhi sa Sugbo, dunay forum diha sa barangay hall sa Tinago sa miaging semana diin usa sa mga speaker mao si retiradong judge Menmen Paredes.
Salamat, Teody Navea, sa maong update.
Didto sa Syudad sa Tacloban, nagmisa ang kura paroko sa Mother of Perpetual Help Parish nga si Fr. Leo Armada, CssR, kabahin sa pagkawala ni Fr. Romano.
Si Romano didto natawo sa Villareal, Samar apan dinhi na sa Sugbo nisilbi sa iyang pagka pri. Gidagit siya sa mga armadong minion sa diktador ug missing gihapon kini hangtod karon.
Matod pa ni Armada, “The Church is not about the bishops, the priests and the religious, we are the Church and we are always for the challenge to speak for the truth and fight for justice and the oppressed (Ang Simbahan dili lang mga obispo, pari, ug mga relihiyoso. Kita ang Simbahan. Anaa kita kanunay alang sa hagit nga mohisgot sa kamatuoran ug ang pakigbisog alang sa hustisya ug sa mga dinaugdaog).”
Matod ni Armada, si Romano nahinumdoman nga nagtabang sa mga kabus sa Sugbo.
Human sa kapin sa 30 ka tuig, gamay ra ang nausab kay mga pari ug ubang mga relihiyoso padayong gipatay ug gidaogdaog hangtod karon. Apan ang Simbahan wala moduko ug magpa-awt.
Ang hagit karon mao ang pagbinantayon ug pagpakabana kon unsa mga panghitabo aron di mahimong buta ug bungol.
“Our challenge nowadays is to be vigilant and be aware on what’s happening today, not to be mute and deaf and quiet but speak and stand out for the truth and spread the Good News for the kingdom of God,” ingon pa ni Fr. Armada.
Pacman
Kampyon na sab si Sen. Manny Pacquiao human niya napatumba sa ikapito nga round ang welterweight champion nga si Lucas Matthysse didto sa Kuala Lumpur.
Klarong lupig kaayo si Matthysse sulod sa pito ka rounds. Gani knockdown kini kaduha sa wala pa ma knockout sa ikapitong round.
Dunay mga amigo sama ni boxing judge ug sports commentator Edward Ligas nga nahibung sa dinuwaan ni Matthysse. Di man kuno ingon adto si Matthysse nga daw nahadlok kang Pacquiao.
Ambot lang sab. Basin ug nahadlok gyud siya tawn kay bisan og dili na ingon kapaspas ang Pacman, bug-at man kayo gihapong ang mga kumo.
(@anol_cebu sa Twitter)