Espinoza: Tungod sa presyo?

TRAFFIC. Ang mga motorista nga gikan sa South padung sa Cebu city ang nag-antos karon sa grabe nga trapiko diha sa Mambaling tungod sa nagpadayon nga trabaho sa underpass sa eskina F. Llamas Street ug N. Bacalso Avenue. Misamot ang problema tungod sa panagbangi nila ni Cebu city Mayor Tomas Osmeña ug ni LTO-7 Regional Director Victor Caindic.

Tungod sa hagit ni LTO-7 Director Caindic nga siya ang mopadagan sa trapiko sa dakbayan, gipaundang ni Mayor Tomas ang mga traffic enforcers nga maoy nagbantay sa dagan sa trapiko sa Mambaling. Matod pa ni Mayor Tomas iyang hatagan og higayon si Director Caindic nga iyang maipakita sa katawhan nga iyang mahimo ang pagpadagan sa trapiko sa Mambaling.

Apan kagahapon sa buntag ang trapiko sa N. Bacalso dapit sa Mambaling diin gitrabaho ang underpass hataas na kaayo ang linya sa mga sakyanan nga makita sa TV footage sa ABS-CBN. Sa maong footage wa nay makita nga city traffic enforcers. Wa usab makita nga mga empleyado sa LTO, nga nagdirihi sa trapiko.

Atong maingon nga ang mga motorista kagahapon nga nabara og maayo sa grabe nga trapiko nga nakasangpit na sa tanan santos aron moluag ang trapiko o di ba kaha nahurot na og litok ang tanan klase sa pamalikas sa mga nahitungdan sama sa nagpagama sa underpass ug sa kontraktor.

Tungod sa panagbangi nila ni LTO Director Caindic ug Mayor Osmeña sa isyu nga way labot ang lungsod ug ang katawhan apan ang nabutang sa luoy nga sitwasyon mao ang mga motorista ug pasahero, labina kadtong mosulod sa trabaho sa buntag. “Hell on the ground” pung pa ni Jason Monteclar sa grabe nga trapik nga iyang nakita sa footage atol sa iyang programa “Anak Bisaya” sa dyCM.

Matud pa ni Mayor Tomas tungod kay nanghambog man si Director Caindic nga “let me show you how to do it” (kabahin sa trapiko), iyang hatagan og higayon pa si Caindic nga makahatag og kasulbaran sa nagbaga nga trapiko sa Mambaling tungod sa pagbuhat sa underpass.

Di man ko engineer, apan di lang kay ako ra ang nahibung og dako ngano nga underpass man gyud ang gibuhat ug dili flyover sama sa mga nahoman na nga flyover dinhi sa dakbayan nga dali ra nga nahoman ug wa kaayo makahatag kalangay kon grabe nga trapiko sa dalan diin gibuhat ang flyover. Unya, mas mahal, matud pa, ang underpass kay sa flyover. Mao diay!

Unsa na man ning gitawag nga urban planners nga ang ipatuman nga proyekto ang underpass man nga, matud pa, mas mahal kay sa flyover. Unya, mas taas ang panahon sa ting-uwan dinhi sa ato kay sa tinghuwaw. Sa ato pa, dunay purohan nga mapuno unya ang underpass sa tubig sa panahon sa bagyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph