NIPADAYAG ang mga bakwit nga kapin bulan na nga nagpasilong sa Kapitolyo nga duna nay gap sa ilang relasyon sa mga empleyado sa kapitolyo.
Kini ang obserbasyon ni Sarisa Acosta, tigpamaba sa tribong Tagbalunon gikan sa Sitio Kamansi, Banglay, lungsod sa Lagonglong, Misamis Oriental, nga apektado sa giyera tali sundalo ug mga sakop sa New People’s Army.
Matud ni Acosta sa SunStar SuperBalita nga wala silay intensyon nga magsinamok sa flag raising sa kapitolyo matag Lunes ug buot lamang nilang mag “die in.”
Tungod sa kasamok nga nahitabo niaging Lunes, Hulyo 16, iyang namatikdan nga aduna nay gap sa relasyon sa mga empleyado nga ga-duty sa ilang area ug moasistar kanila.
“Sa una, naa sila moatobang sa amoa ug magbutang ug lamesa pero karon wala na sila,” matud ni Acosta.
Hangyo lamang niini nga unta mahatagan sila og panahon ni Governor Yevgeny Emano tungod kay padayon sila nga gapaabot nga atubangon sila niini.
“Lahi man gyod kung siya ang moatubang namo kaysa iyang pamahayag iya lang ipasa sa bisan kinsa ug ngadto sa mga media.” pahayag niini. (SVB)