DAKO ang posibilidad nga trauma ang dala sa 10 anyos nga batang babaye nga dul-an tulo ka oras nga gi-hostage sulod sa convenience store niadtong Sabado, Hulyo 14 sa Kauswagan, dakbayan sa Cagayan de Oro.
Sa interbyu sa SunStar SuperBalita kang Katherine Callanta, social worker sa City Social Welfare and Development (CSWD), iyang gibutyag nga emosyonal nga sa aspeto apektado kaayo ang bata sa hitabo.
“Ang bata emotionally naapektohan sa mga events nga nahitabo.” Personal nga panglantaw niini apan adunay uban nga semana lang maka-recover dayon diretso.
“Pero kung mo abot na siya og months, matawag siya nga trauma kay long period na for me lang if the family can help sa bata nga ma-overcome that's good but if the child manifests lahi na nga behavior kailangan siya ipa-consult na sa psychologist,” dugang niini.
Kahinumduman nga naukay ang katawhan sa maong hitabo dihang usa ka Nove Salon, lumad nga taga Camiguin ang kalit ni-hostage sa usa ka batang babaye nga kostumer usab niadtong tungora.
Unang gigamit niini sa pagpang-hostage ang fire extinguiser diin gihikot ang hose sa liog sa bata. Gibawian usab niini og pusil ang sekyu ug nakapabuto makausa ka higayon.
Tungod kay armado kini sulod sa authorized personnel room nga gi-lock niini kauban ang batang babaye naglisod ang kapolisan hinungdan moabot tulo ka oras kapin ang gihimong negosasyon sa kapolisan.
Matud ni Police Superintendent Mardy Hortillosa, tigpamaba sa Cagayan de Oro City Police Office, nga dako og tabang ang igsuon sa suspek atol sa negosasyon hinungdan sa pagtahan niini tungod kay buot niini nga walay makitang pulis sa dapit.
Detinado na ang suspek karon panahona kinsa gikatakdang mag-atubang og kaso samtang ang bata gipaubos na sa psychological process.