PATAY ang magtiayon human nagnilubaay niadtong Hulyo 14, 2018 mga alas 10:00 sa gabii sa Bolonsori, Barangay Camaman-an, dakbayan sa Cagayan de Oro.
Nagbuy-od ug naligo na sa ilang kaugalingon nga dugo dihang naabtan sa anak sila Ebo Perocho, 66 ug ang asawa niini nga 47 anyos.
Gibutyag sa anak sa magtiayon nga si Gina nga ang pakigrelasyon sa iyang inahan sa laing lalaki ang gituohang hinungdan sa pagpatay sa duha.
Gikumpirma ni Gina nga taud-taud na nga dunay laing lalaki ang iyang inahan.
“Selos man ang ilang giawayan, kay kanang akong mama dugay naman gud nga naay ka relasiyon mga gagmay pa mi hangtod daw karon maoy ingon sa lalaki,” tipik sa pahayag ni Gina.
Sa nahipos nga impormasiyon gikan sa Northern Mindanao Medical Center (NMMC) ning siyudad, gikabutyag nga sa wala pa nahitabo ang insidente, nag-inom ang magtiayon kay nakakuha ang bana og kwarta sa gadawaton niini isip senior citizen.
“Pagsulod nako sa maong balay, hayang na silang duha,” dugang pahayag ni Gina.
Nakaangkon ang amahan og samad sa dughan, ubos sa ilok, kilid ug sa kamot kinsa nadala sa NMMC samtang ang inahan ang nadala sa laing tambalanan diin kini nakabsan sa hinulamang kinabuhi human nakaangkon og samad sa dughan.
Nanghinaot ang mga anak nga makonsensiya ang lalaki nga ka relasyon sa ilang inahan sa nahitabo.