GIHANGIT ni kanhi WBO Welterweight champion Jeff Horn si WBA Welterweight champion Manny Pacquiao sa usa ka rematch.
Si Horn, (18-1-1,12 KO) kinsa maoy nidaog sa kontrobersyal nga unanimous decision batok ni Pacquiao niadtong Hulyo 2017 didto sa Australia.
“Congratulations Manny Pacquiao. Rematch?” Matod pa sa Australiano.
Si Pacquiao nibalibad sa iyang rematch batok ni Horn niadtong Disyembre 2017 sanglit wala magtakdo ang iyang schedule sa iyang trabaho sa Senado.
Si Horn gipatikangkang ni Terrence Crawford sa round 9 atol sa ilang away didto sa MGM Grand sa Las Vegas Nevada, USA ug giilog ang iyang WBO belt.
Si Pacquiao nibalik og saka sa boxing ring usa katuig human siya gipukan ni Horn ug iyang gipakita nga aduna pa siyay hustong ikabuga dihang iyang gipaluhod ug gipatikyaob si Lucas Matthysse sa Argentina diin gipaundang kini sa referee sa 7th round.
Human mapilde si Horn sa niaging buwan, iyang gibutyag nga posible niyang ikakontra mao si Pacquiao sa umaabot apan nipis ang posibilidad niini.
Gawas ni Horn, adunay daghang maayo nga boksidor nga posibleng ikaaway ni Pacquiao nga naglangkob nilang WBA lightweight champion Vasyl Lomachenko kinsa posibleng mag-abot sa catch-weight nga 140 pounds.
Si Lomachenko padayon pang nagpaalim sa iyang angol sa abaga nga iyang nakuha sa atol sa ilang away ni Jorge Linares kinas iyang gipalukapa ug posibleng mobalik sa ring karong buwan sa Nobyembre o December nga mao sab ang gi-target sa kampo ni Pacquiao. (PAC)