Dear Noy Kulas,
Maayong adlaw ninyo sa Superbalita. Just call me Cardo, nagtrabaho ko nga family driver kapin na sa 10 ka tuig sa usa ka pamilya.
Ang akong amo sukad kaniadto kaning usa ka foreigner nga di lang nako isulti ang iyang nationality aron di maklaro kay kusog ra ba mobasa ang akong mga paryente sa inyong newspaper.
Nakaasawa og taga Cebu ang akong amo nga bata pa niya og mga 10 ka tuig. Iyang gihatagan og negusyo ang iyang asawa kay maayo si Mam mopadagan og kwarta. Maayo ang dagan sa iyang negusyo ug milambo ang pagpuyo. Maayo si Mam nako mao nga nirespeto ko niya, pero nausab ni tanan human siya makigsusyo sa usa ka lalake.
Pirme nang wala si Mam sa balay kon wa ang iyang bana sa Pilipinas kay mag-ulian sa abroad si Sir. Kon wa si Sir, si Mam magsige og laag aron kuno motambong og business meeting. Di ko niya pakuyogon kay gabii na kuno kaayo sila mahuman ug mahago na ko. Pero sa pagkatinuod nagduda ko ani nila kay naay panahon akong nakit-an si Mam nga dunay tsikinene sa iyang liog.
Noy, ako kaha ning isumbong si Mam kang Sir kay nagduda kaayo ko aning iyang mga lakaw kay di siya ingon ani kon wa si Sir. Maayo kaha, Noy?
CARDO
Cardo,
Mas maayo nga duna kay ebidensya kon unsa man ang lakang nga imong pagahimuon. Apan mas maayo kon di na lang ka manghilabot unless ang bana magduda na sab sa iyang asawa. Madugayan mabantayan ra na sa iyang bana.
Mahimo usab nga mangita kag way nga makapahibawo ka sa iyang bana kon gusto ka gyud nga masanta nang gibuhat sa imong mam. Mas maayo usab nga estoryahan nimo siya nga ganahan kang mohatod ug mokuha niya isip drayber sa iyang bana sa wa pa sila magminyo, madugay o madali man siya sa iyang mga lakaw kay imo ning buhat isip drayber.
Kon di siya mosugot, ayaw pamugos. But pangitag paagi nga makakita kag ebidensya nga mabasehan sa imong pagduda. Pag-amping lang nga di ka mamahimong hinungdan sa ilang away kay basin mawad-an ka na hinuon og trabaho.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)