GANAHAN ko motan-aw sa bag-ong pelikula ni Anne Curtis nga “BuyBust” sa Viva Films kay na-disbeauty siya aning salidaha.
Nagkapangus-pangus ug nabun-og sa shooting ani si Anne tungod sa grabeng aksyon ubos sa direksyon ni Erik Matti.
Sa Agusto 1 pa ang regular showing apan naa silay premiere showing sa SM Seaside Cebu ug moabot si Anne aron personal nga motambong sa movie premiere.
Ganahan mo makakita ni Anne sa personal? Kitakits ta sa ilang premiere showing karong Dominggo, Hulyo 22.
Gawas ni Anne, ang action-thriller nga “BuyBust” gibituonan sad sa Fil-Am ug MMA fighter, Brandon Vera, Victor Neri, Arjo Atayde, AJ Muhlach, Joross Gamboa, Noni Buencamino ug uban pa.
Alang sa dugang detalye, basa-basa lang n’ya mo sa atong Tagming, ming, ming...
Inday sa Cebu
Dunay nag-post sa Facebook og mga litrato sa Kapuso stars Barbie Forteza ug Derrick Monasterio nga nanuroy sa Cebu Safari and Adventure Park sa Carmen niadtong Dominggo sa buntag.
Matod sa atong Facebook friend daghan kuno kaayong van sa GMA pag-abot nila sa Safari ug daghan kaayong mga camera.
Kon wa ko masayup, nag-shooting to sila sa primetime seryeng “Inday Will Always Love You” sa GMA. Daghan gihapon kaayong tawo sa Safari. Naay nagpa-picture nilang Barbie ug Derrick apan wala ra kuno dumoga.
Didto sad diay sila og Oslob niadtong Biyernes kay nag-post man si Derrick sa iyang Facebook.
Kinsa siya?
Bag-o lang ko nahibawo nga giatake sa kasingkasing ang sikat nga Cebuano singer nga nikampiyon na niadto sa singing contest sa usa ka TV noontime show sa Manila.
Naparalisa kuno ang halos katunga sa lawas sa maong singer mao nga jobless intawon ni karon. Giatake siya sa miaging buwan pa. Apan maihap ra sa iyang mga higala ang nasayud kay dili kuno ni ganahan mapublikar ang iyang kahimtang.
Guest ni siya namo sa una sa anniversary sa Superbalita. Ang iyang lifestory gihatagan na og kinabuhi ni Vice Ganda sa national TV. Ato siyang ipangaliya. Get well soon!
Way katagbawan
Sakto ang gihimo ni Manny Pacquiao nga mamili og kontra nga kanang kaya ra sad niya.
Kay kon mamili siya og mga dekalibreng boksidor sama sa undefeated nga si Terence Crawford nga maoy ni-TKO sa Australyanong si Jeffrey Horn, kuyaw sa disgrasya labi na sa iyang edad nga 39 na.
Mangyawat pa gyud bisan daghan na’g kwarta no!? Pastilan. Retire na Sir Manny, uy!