ANG nagpadayong panagbangi ni Cebu City Mayor Tomas Osmeña ug Land Transportation Office (LTO) 7 Regional Director Victor Caindec nakaapekto na sa trapik sa eskina sa N. Bacalso Ave. ug F. Llamas sa Barangay Mambaling, dakbayan sa Sugbo kagahapon. Way traffic enforcer sa sayo nga buntag nga trapik. Gitinuod ni Osmeña ang bahad nga dili mobutang og mga sakop sa Cebu City Transportation Office (CCTO) ug sa pikas bahin, ang LTO 7 wala modumala sa trapik sa dapit human dili kini ilang nag-unang mandato ug walay legal nga dokumento sa pagpuli sa trabaho.
Ang resulta? Mga motorista ug publiko mao ang nahasol ug nag-antos. Paet, maayo pa og walay opisyal nga atong saligan sa pagpatuman sa tahas sa dakbayan. Kon sumadahon nato ang dagan sa istorya, mogawas nga garbo lang ang mipatigbabaw ug gisawsawan sa bulok sa pulitika. Mao kini hinungdan nga maglisod sa paghimo og komon nga solusyon, sama sa tubig ug lana nga dili pwede masagol. Si Caindec, sama sa naasandig usab og lig-ong politiko sa administrasyon, walay lipudlipod ug pintok mosulti batok sa mayor nga bikilon usab og batasan ug panglawas, walay pasayluon usab nga istorya.
Ug isip mayor, mas dako og kaakuhan si Osmeña sa paghan-ay sa trapiko sa usa sa mga dapit nga ubos sa iyang hurisdeksiyon. Ang LTO nasyonal nga ahensiya nga dunay lahing tahas sa pagpatuman sa nasudnong balaud ug mga polisiya sa trapiko. Samtang si Caindec bag-o lang nato naila sa iyang pagkapintok manulti apan, si Osmeña daan nang naila nga dominante o pagkaarogante usahay manulti. Basta maoy iyang gusto, mao kini matuman. Kon makaayo sa dakbayan, walay problema. Kon nagpahipi ang personal nga interes, bulilyaso ang katawhan.
Bisan dunay pagkaimposible apan manghinaot nga molurang na ang ilang garbo ug sobrang pamulitika aron maghiusa sa pipila ka isyu nga apektado ang katawhan ug negosyo sa dakbayan.