ADUNAY mga tawo nga bisan sa kahimsog sa ilang panglawas, anaa nagpakabuhi daplin sa karsada pinaagi sa pagpangayo og limos.
Apan adunay pipila ka mga tawo nga bisan sa deperensiya sa ilang panglawas, wala kini makababag sa iyang damgo ug pagtatabang sa iyang pamilya.
Si Reche Ardimer, 35, kamaguwangan sa unom ka mga igsuon ug anak nila ni Leonides ug Erlinda Ardimer, kinsa lumad nga taga barangay Taptap, bukiran sa dakbayan sa Sugbo.
Si Reche ni-graduate sa elementary sa barangay Taptap ug barangay Adlaon sa iyang high school.
Kon tan-awon ang duha ka mga barangay sa mapa, maora kini og dug-ol, apan sa tinuoray, layo kini ug naa pa sa bukid nahimutang.
Di sayon alang kang Reche sa pag-eskwela kay maglakaw lang siya taliw sa iyang orthopedic disorder.
Si Reche adunay deperensiya sa iyang mga kamot ug tiil nga maoy hinungdan nga maglisod siya og lakaw ug dili usab siya makakupot og bug-at nga butang.
Giantos niya ang pag-eskwela taliwa sa kalisod sa ilang pagpuyo aron ugma damlag aduna siyay kinaadman nga magamit sa pagpanarbaho,
Tuod man, sa iyang pag-graduate sa secondary, nieskwela siya sa Area Vocational Rehabilitation Center ug iyang nahuman sulod sa usa ka tuig.
Apan wala pa siya natagbaw, ni-enroll siya sa University of the Visayas (UV), apan first year ra siya kutob kay di na makaya sa iyang inahan paggasto sanglit wa silay kwarta ug daghan pa siya og mga manghod.
Gumikan sa iyang tinguha nga makasukli sa pag-atiman sa iyang ginikanan, ni-apply siya og trabaho sa Cebu City Government niadtong 2003.
Trabaho lang
Niduyog kaniya ang panahon sanglit gidawat siya ubos sa Department of General Services diin ang iyang trabaho mao ang paghimo og streamers pinaagi sa lettering.
Pagka-uso sa tarpaulin printing, gibalhin siya isip elevator operator sa executive building sa Cebu City Hall niadtong 2004 hangtod karon.
Ang ubang mga casual employee, kon mag-ilis ang mayor, kasagaran di na usab i-renew ang ilang kontrata, apan si Ardimer nagpadayon sa iyang serbisyo.
“Tagdon nato sila ug ayuhon og abi abi ang mga mosulod sa elevator. Ato tarungon og tubag sa ilang pangutana ug pahiyom pirmi.Panarbaho ra gyud akoa kay wala man tay labot anang eleksyon basta makatrabaho lang ko, okay na,”paghulagway ni Reche.
Ang iyang sweldo nga kapin P10,000 matag buwan, iyang bahinon. Naay para hatag sa iyang mama Erlinda, palit og kunsomo ug hatag og allowance sa iyang 14 anyos nga kamanghoran.
Dihang nasakit ang iyang inahan, daw nidat-og kaniya ang kalibutan sanglit siya ra ug usa niya ka manghod ang adunay trabaho, apan taliwa niini, gitabangan sila sa Kahitas-an.
Nagka-utang-utang siya niadtong panahona, apan nasulbad ra gihapon ang maong pagsuway.
Matod ni Reche kinsa 15 ka tuig nang nagtrabaho nga motrabaho siya hangtod kaya pa sa iyang lawas.
Malipayon siya nga bisan sa iyang kakulian sa panglawas, makatabang gihapon siya sa simple nga paagi.