DI na sama kadaghan ang nagpositibo sa illegal nga drugas ang mga tawo nga nanarbaho ubos sa Cebu City Government karong tuiga kon itandi sa 2017.
Kini base sa datus sa Cebu City Office for Substance Abuse Prevention (Cosap).
Prayoridad na usab sa Cosap ang Community Based Rehabilitation Treatment sa matag barangay.
Sa unang unom ka buwan karong tuiga niabot sa 1,836 ka mga kawani sa barangay ug City Hall ang gipaubos sa Cosap og drug test. Ang 29 nila nanagpositibo.
Gikan Enero ngadto sa Hunyo niadtong 2017, adunay 4,325 nga gipangsweldohan sa Cebu City Government nga gipang-drug test, ug 173 kanila ang nagpositibo.
Matod ni Cosap executive director Garry Lao nga epektibo nga anaa na sa Cosap ang pagproseso sa payroll sa mga tanod sa barangay.
Aron masiguro nga luwas ang barangay ug wala naggamitan og ilegal nga drugas ang tanod nga mao’y nagsilbi nga moprotehir sa matag tawo sa barangay.
Pasabot ni Lao nga dili lang drug test o information education ang iyang buhatan, apan lakip niini ang rehabilitasyon diin mas nidaghan na ang barangay nga nihimo niini.
Gikan sa 4 ka barangay niadtong 2015, karon anaa na kini 17 ka mga barangay nga naghimo niining CBT.
Niabot na usab sa 57 ka mga surrenderees ang nihuman sa maong rehab treatment.
Samtang aduna na sila’y 257 ka mga enrollees ug gipahibawo ni Lao nga voluntary kini diin matawag kini nga self rehab tungod kay gidawat sa usa ka user nga nigamitan siya ug gusto niini magbag-o.
Wala pa’y labot niini ang outpatient nga aduna na’y 15 ka graduates ug 97 ka mga enrollees.
Sugod lang niadtong Hunyo dihang mohatag ang Cosap og food assistance sa drug surrenderees nga ni-enroll ug mograduate sa ilang “WE CARE Program.” Aduna’y gitagana nga P316,000 ang Cosap aron mohatag og tag 5 ka kilo nga bugas diin 1,000 kini ka sako alang sa 2018.
Gipahibawo usab ni Lao nga mas gamay na ang requirements sa tanod nga isumiter alang sa ilahang cash incentive gikan sa City Hall.
Gikan sa 9 kaniadto, anaa nalang kini sa 7.
Sa pagkakaron, sugdan na usab nila ang re-orientation sa tanang Barangay Anti-Drug Abuse Council sa 80 ka barangay tungod kay bag-o ang mga opisyal ingon man ang mga kawani.
Aduna usa’y himuon nga Badac summit ang Cosap aron mapalig-on pa ang programa niini batok ilegal nga drugas.
Cosap 2018 Budget:
1. P5,000,000 - Anti-Drug Programs
Naglakip:
A. Drug test ug confirmatory test
B. Training ug seminar sa Cosap staff
C. Badac Anti-Drug Programs
D. Capability building ug Facilitation
sa CBT recovering addicts
E. Drug Awareness Activity
F. Honorarium sa CBT Facilitator
G. Stage Drama sa Cosap
2. P4,000,000 - Supplies & Materials
Naglakip:
A. Inter-rehab CBT basketball
tournament
B. Education assistance sa mga anak
sa drug surrenderees nga ni-enroll
sa CBT
C. Food assistance sa pamilya
D. Drug awareness activity (materials)
E. Information Education Campaign
(materials)
F. Community Based Treatment
(supplies & materials)
3. P315,000 - Food & Meals
Naglakip:
A. Badac re-organization orientation
B. Cadac Meeting
C. CBT food assistance
D. Drug awareness monthly activity
and awarding
E. Training sa Anti-Drug Campaign