GITATAW ni Mandaue City Mayor Luigi Quisumbing nga gikatakdang ablihhan sa publiko ang bag-ong merkado sa hinapos sa Agosto.
Ang pagbukas unya niini i-atol sa Charter Day sa dakbayan karong Agusto 30.
Matod ni Quisumbing sa dihang nahinabi sa mga tigbalita nga ang reconstruction process sa bag-ong pasilidad mahuman karong buwana samtang nagpadayon ang adjustment period sa pagbalhin sa ilang mga kahimanan ang mga kwalipikadong tindera.
“It’s slated for completion by the end of the month. Most (days of) August will start the transfer of vendors (to the new market),” matod ni Quisumbing.
Kahinumduman nga ang kagamhanan sa dakbayan nigahin og P65 milyones nga budget alang sa pagtukod ug paghuman sa bag-ong merkado.
Dugang ni Quisumbing sa di pa ang pag-abli, mahimong makita sa mga tindera ang ilang status ngadto sa Market Administrator’s Office.
Sa milabayng buwan, nanawagan si Atty. Ernesto Maringuran sa mga market vendor aron mahibaw-an ilang kasamtangang estado sa pagpamaligya sa merkado, kini aron masuta kun makabalik pa ba sila og abang og pwesto o di sa bag-ong merkado.
Ang bag-ong merkado nahimutang luyo sa National Shrine of St. Joseph, ang kanhi nahimutangan sa sa daang merkado sa wa pa kini gibalhin luyo sa City Cultural and Sports Complex.
Sa mga 1,600 ka rehistradong market vendor sa City hall, mga 1,200 lang niini ang maka-abang sa bag-ong merkado tungod kay mao man lang kini ang kapasidad sa bag-ong edipisyo.
Prayoridad sa kagamhanan kadtong mga tindera nga aktibo sa pagbayad sa ilang buhis sa City Hall, padayag ni Quisumbing.
Nisulti siya ning mantalaan nga mga 400 sa 1,600 ang utangan o wa magbayad sa ilang buhis sa City Hall.
Matod sa mayor nga kadtong mga wa pa makahuman og bayad sa buhis mahimutang unya sa “waiting list.”
“For those (vendors) that have not updated (their settlements) they will be under a waiting list,” saysay ni Quisumbing.
Sa milabayng tuig, nalangay ang pagtukod sa merkado human basura nga humok ang yuta sa tukuran sa building.
Nagsugod ang pagtukod sa bag-ong merkado niadtong Enero 2016 human mga ang kasamtangang merkado luyo sa Sports Complex giguba sa magnitude 7.2 nga linog niadtong Oktubre 2013. (JPP)