GIKLARO sa Cebu Provincial Commission on Elections (Comelec) nga mahitabo lamang ang no election scenario alang sa tuig 2019 kon dunay mamugna nga bag-ong Konstitusyon o balaod.
Duda sab si election officer Ferdinand Gujilde kon maapas pa ang pagmugna sa bag-ong Konstitusyon sa tinguha nga maoktaba ang piniliay tungod usab sa kahagip-ot na sa panahon.
Gipasabot ni Gujilde nga sa kasamtangang Konstitusyon, gilatid ang pagpahigayon ug piniliay sa matag ikaduhang Lunes sa buwan sa Mayo, matag tulo ka tuig.
Mahimo lang kining maoktaba kon dunay di mapugngan nga kalamidad, terorismo ug pagkawagtang o destruction sa election paraphernalia.
Dugang niya, anaa lang usab sa Comelec En Banc ang awtoridad nga makadesisyon kon ihinayon o di ang eleksiyon.
Tungod sa gipalutaw nga no election scenario sa sunod tuig alang sa posibleng transition ngadto sa federal form of government, gipadayag ni Gujilde nga mahimo lang kini kon duna nay mahan-ay nga bag-ong Konstitusyon o balaod.
Ang pag-usab sa Konstitusyon mahimong himuon pinaagi sa Constituent Assembly, Constitutional Convention ug People’s Initiative.
Duda si Gujilde kon maapas pa ang pagpa-oktaba sa piniliay sunod tuig tungod usab sa kaapiki na sa panahon ug sa kataas sa proseso alang niini.
Sa buwan sa Oktubre, himuon na ang filing sa certificate of candidacy alang sa mga buot mokandidato sa 2019 midterm elections.
Nagpadayon usab karon ang rehistrasyon sa Comelec ug molungtad kini hangtud sa Septiyembre 29.
Sa unang semana sa rehistrasyon o gikan Hulyo 2 hangtud Hulyo 7, kapin sa 15,000 ka mga indibidwal ang nipahimulos niini.
Ang mga siyudad sa Sugbo, Mandaue ug Lapulapu maoy nitala sa labing taas nga ihap sa mga tawo nga nagparehistro sud sa maong panahon.
Ang mga lokal nga buhatan sa Comelec abli gikan Lunes hangtud Sabado, lakip na sa mga holiday, alang sa pag-entertain niadtong mga buot magparehistro. (AZLG)