2 pulis sa Cebu City nga namuwang, girelibuhan

DUHA ka pulis sa siyudad sa Sugbo nga nakuhaan ug hulagway sud sa tigbakayan ang gipaubos sa imbestigasyon sa Police Regional Office (PRO) 7 ug gimandoan nga parelibohan sila sa katungdanan ug gipaimbargohan sa ilang mga armas.

Niadtong Hunyo 23 ning tuiga, unang nasigpatan sa RED Team sa PRO 7 nga naa sa sud sa tigbakayan sa A. Lopez, Brgy. Calamba sa siyudad sa Sugbo si PO2 Jansen Caña sakop sa Abellana Police Station 2.

Pagka Hunyo 29, laing pulis sa siyudad sa Sugbo nga nadestino sa Personnel Holding and Accounting Unit ang nakuhaan usab og hulagway nga naa sa buwangan sa siyudad sa Naga nga mao si SPO1 Felipe Alfeche.

Matod ni P/CSupt. Debold Sinas nga ang duha ka mga pulis ipaubos niya karon sa imbestigasyon nganong nanugal kini sa mga tigbakayan nga hugot na man kining gidili sa PNP organization nunot sa kamandoan ni Presidente Rodrigo Duterte.

Gawas sa pagparelibo sa duha ka mga pulis gipapangayoan usab og pagpasabot ang hepe sa siyudad sa Naga ug San Nicolas Police Station nganong adunay tigbakayan sa ilang area of responsibility.

“Naa tay picture nila nga nanugal sa tarian ang usa katong diha sa A. Lopez naa gyud sa sud sa kanang naay manok nagsabong bitaw? Naa sa picture, kini sila atoa usa paimbestigaran ato ipa-relieve unya paimbarguhan sa ilang armas,” matod ni Sinas.

Matod ni Sinas nga seryuso ang PNP labot na sa paggukod niadtong mga pulis nga manugal ug mosud sa mga pasugalan.

Nag-umol ang PRO 7 og grupo nga gitawag ni Sinas nga Red team diin ang ilang trabaho mao ang pagpaniid niadtong mga pulis nga nakahimog kalapasan sa balaod.

Ang trabaho sa mga personnel nga naa sa Red team mao ang pag-monitor sa mga pulis nga mosud sa mga balay kahilayan lakip na sa pasugalan ug kuhaan kinig picture.

“Naa koy RED team, ang akung mando nila monitoron ning mga pulis nga manugal, mosud sa casino, buwangan ug sa mga golf course kay bawal na,” dugang ni Sinas.

Si P/CInsp. Maria Theresa Macatangay ang hepe sa Abellana Police Station 2 miangkon nga sukad niadtong milabayng semana iya nang gipa relibohan si Caña.

Matod ni Macatangay nga nahimo nang bisyo ni Caña ang pagpanugal ug iya na matod pa kining gipahimangnuan nga hunongon na ang matang sa bisyo sanglit adunay kamandoan ang presidente nga hugot na kining gidili.

“Wala ta magkuwang sa pag-remind nila nga hunongon nana, di man patuo, mao nani ang resulta,” matod ni Macatangay. (AYB)