GIPANAWAGAN sa simbahang Katoliko sa Sugbo ang pagsalmot sa mga Sugbuanon sa tulo ka adlaw nga pagpuasa, pag-ampo ug pahatag og limos sugod karong adlawa hangtod sa Huwebes isip pagsanong sa panawagan sa Catholic Bishops Conference of the Philippines (CBCP).
Kini nga panawagan maoy lakang nga gikasabotan sa kaobispohan sa nasod isip tubag sa mga pagtamay batok sa Diyos nga gihulagway ni Presidente Rodrigo Duterte nga “stupido.”
Si Msgr. Joseph Tan, tigpamaba sa Artsidyosesis sa Sugbo, niingon nga kini maoy ilang “pamaagi sa pagtubag sa mga panghitabo sa ninglabay nga mga adlaw nga naay daghang padayong pagpamatay, dunay gitawag nga pagpamakak ug dunay pagpasipa sa dungog sa Ginuo.”
Ang mga adlaw sa pagpuasa, pag-ampo ug paghatag og limos gikasabotan sa kaobispohan human sa ilang ika-117 nga plenary assembly niadtong Hulyo 7 hangtod sa Hulyo 9.
Nalakip kini sa bag-ong gipagawas nga Pastoral Exhortation sa CBCP nga giulohan og “Rejoice and Be Glad,” nga nagbatbat sa baruganan sa mga lider sa simbahang Katoliko kabahin sa kahimtang ug dagan sa nasod nga gitimaan sa kusganong pagpangatake sa presidente sa simbahang Katoliko.
Giklaro ni Tan nga di kini paagi sa pakigbisog sa simbahan batok sa gobiyerno.
“Kay ang simbahan wa man gyud mohunong sa iyang pagtahod kang Presidente Duterte. Unya ang mga sakop sa simbahan sakop pud baya sa nasod, sakop pud baya na niya,” pagpasabot ni Tan dihang nahinabi sa Superbalita Cebu sa miaging semana. Nasayran, ang pagpuasa sagad himuon sugod sa Miyerkules sa Badlis, Biyernes Santo o sud sa mga adlaw sa Kwaresma diin mokaon og usa ka full meal sa usa ka adlaw ang usa ka matuohan. (SCG)