Pinay namatay sa US; Pamilya nanawagan

Namatay. Nagduda ang kabanay ni Estelita Gonzales-Schmitt sa DFA nga mauli ang iyang patayng lawas nganhi sa nasod.  (Hinatag nga hulagway)
Namatay. Nagduda ang kabanay ni Estelita Gonzales-Schmitt sa DFA nga mauli ang iyang patayng lawas nganhi sa nasod. (Hinatag nga hulagway)

KABANAY ni Estelita Gonzales-Schmitt nanawagan sa Department of Foreign Affairs (DFA) nga mauli ang lawas sa Pinay nga gidudahang adunay foul play ang iyang kamatayon.

Si Estelita, 56, nga taga Sityo Sangi, Brgy. Pajo, Lapu-Lapu City ang nakabana og 68 anyos nga Amerikano, si Nicholas Schmitt III.

Si Jennifer Gonzales–Felias, anak ni Estelita sa unang bana, misaysay nga niadtong Nobiyembre 2017 milarga ang iyang inahan paingon sa Chicago, Illinois, USA nga wa pay tuig silang nagkaila sa langyaw.

Kini human nga pasado sa medical examination si Estelita nga gi-require sa US Embassy aron nga kaaprobahan ang visa.

Niadtong Enero ning tuiga gikasal ang Pinay didto sa America diin ang iyang pamilya nga nahibilin sa Pilipinas natingala sa kapaspas sa panghitabo, pun-an pa sa mga di kasagarang lihok (wa sa kaugalingon) niini sa higayon nga mo-communicate sa iyang pamilya ug higala gamit ang Facebook Messenger.

Matod ni Jennifer nga sa ilang dakong kakurat nga niadtong Hunyo 29 gipahibawo sila ni Schmitt nga patay na si Estelita kay matod pa nag-antos kini sa brain tumor.

Giingong gidali sa pagdala sa tambalan ang Pinay kay gikinahanglan nga ipaubos sa dinaliang operasyon apan wa kini masalbar pangangkon sa maong foreigner.

Naglisod sa pagtuo ang kabanay ni Estelita sanglit kon aduna kini gihambin nga sakit sa dihang nipaubos sa medical exam alang sa iyang visa nasuta na untang daan ang iyang gipamati ilabi na nga extensive ang examination nga gipahigayon sa Saint Luke’s Hospital didto sa Makati City.

Nagdumili sab ang langyaw sa pagpakita og medical records nga nagpamatuod nga adunay cancer o tumor ang maong Pinay.

Taliwala sa ilang pagbangutan gipahibawo sab sila ni Schmitt nga gilubong na ang lawas ni Estelita bisan nga mihangyo ang pamilya nga i-uli nalang sa Pilipinas.

Usa sa mga iyaan ni Jennifer mibutyag nga ilang nasayran nga si Estelita giingong ikalima nang asawa ni Schmitt ug ang upat nga na-unang misis niini pulos sab nangamatay. (FVQ)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph