KAPIN sa P500,000 nga balor sa mga paltik nga armas nasakmit sa Philippine Coast Guard Sub-Station sa Bato, lungsod sa Samboan, nga ipalusot unta paingon sa Dapitan, Zamboanga del Norte.
Moabot ngadto sa 46 ka kalibre .45 nga pistola nga kompleto na sa magazines ang nasakmit sa Philippine Coast Guard inabagan sa kapulisan sa lungsod sa Samboan pasado alas 7 sa gabii niadtong Sabado.
Ang mao nga mga armas giingong nakalusot sa Cebu South Bus Terminal (CSBT) nga gikompirmar usab sa management.
Wa pa motug-an ang tulo ka gidudahang mga gun runner kinsa ang tag-iya ug kinsa ang ilang baligyaan.
Si Commander Jerome Cayabyab sa Philippine Coast Guard Cebu station nagkanayon nga nisusi ang iyang mga sakop sa Maritime Security and Maritime Safety Administration Inspection sa mga bus nga motabok sa Mindanao agi sa pantalan sa Bato, Samboan dihang kalit lang nga nakamatikod ang ilang K9 unit nga kadudahan nga bagahe sa Ceres bus.
Ila dayon nga gimandoan ang driver nga way pagawason nga pasahero samtang nagpadayon sila sa pagsusi sa lain pang bus.,
Dinhi ila na usab nga nabantayan nga ang ilang K9 unit nilingkod na usab nga nagpasabot nga laing kontrabando ang namatikdan.
Tungod niini, nanawag dayon sila sa Samboan police station aron ipasusi ang mga bag nga bantayan sa ilang K9 unit.
Sa pag-abli sa mga pulis, ilang nakita ang mga armas nga bag-o pang nahuman nga gipang putos pa sa papel.
Pinaagi sa abag sa konduktor sa Ceres bus, ilang nailhan ang tag-iya sa mga bag nga silang Velino Cubol, 36 ug ang asawa niini nga si Flora Mae Cubol, 35, ug ang kauban niini nga si Maria Bella Manot, 55, pulos taga Barangay Suba, siyudad sa Danao.
May lapso
Giangkon sa Cebu South Bus Terminal nga may lapso sa ilang seguridad human nga malampuson nga nakasulod ug nakasakay og bus paingon sa Bato Port sa lungsod sa Samboan ang tulo.
Gipasubay pa hinuon ni CSBT Operations Manager Joey Herrera sa mga kuha sa closed-circuit television (CCTV) sa terminal kon asa nisulod o niagi ang mga suspetsado.
Giangkon niya nga kon nagsakay og taxi o pribadong sakyanan ang maong mga tawo, wala na kini makaagi pa sa entrance nga dunay gwardiya. (AYB, AZLG)