SECTIONS
Friday August 17, 2018
SUPERBALITA CEBU

Ibalik na ang traffic enforcers sa Mambaling

Nanghunaw. Mga tarpaulin nga nagpahibawo nga iya na sa Land Transportation Office (LTO) ubos sa pagpangulo ni Regional Director Victor Caindec ang pagdumala sa trapiko sa Mambaling area ang gipangbitay sa dapit, usa niini sa skywalk sa N. Bacalso Avenue, Cebu City. Way bisan usa ka traffic enforcer ang nagdumala sa trapiko kagahapon sumala sa bahad ni Cebu City Mayor Tomas Osmeña. (Alex Badayos)

HUMAN nisamot ang kahuot sa dagan sa trapiko sayo sa buntag kagahapon sa N. Bacalso Avenue ug mga dalan nga duol sa nagpadayon nga konstruksyon sa underpass, nausab ang hunahuna ni Cebu City Mayor Tomas Osmeña ug nimando nga butangan kini og balik og mga traffic enforcer.

Kini samtang nibahad si Land Transportation Office (LTO) 7 Regional Director Victor Emmanuel Caindec nga mopasaka og kasong dereliction of duty batok kang Osmeña human gipa-pull out niini ang mga sakop sa Cebu City Transportation Office sa Mambaling area kagahapon.

Si Osmeña unang nimando nga dili na ang mga traffic enforcer sa siyudad sa Sugbo ang modumala sa dagan sa trapiko sa mga dapit duol sa gitukod nga underpass kay iya kining gisangon ngadto sa LTO human sila magkasungi ni Caindec.

Apan gitataw sa regional director nga dili nila responsibilidad ang pagpatunhay sa suliran sa dagan sa trapiko sa maong mga lugar kay mandato kini sa local government unit ubos sa Local Government Code.

Matod niya, pagmatuod niini mao ang pagtukod sa kagamhanan sa siyudad sa Sugbo og City Traffic Operations Management (Citom) subay sa City Ordinance 1264 ug ang City Ordinance 801 kun Cebu City Traffic Code.

Si Caindec namahayag nga isip mayor sa siyudad, responsibilidad ni Osmeña ang pagpatunhay sa dagan sa trapiko ug ang pagsulbad sa ubang mga problema sama sa baha ug basura.

“Dereliction of duty man na iyang gibuhat pag-pull out sa mga traffic enforcers. Iyang gipatigbabaw ang iyang kasukot kay natandog ang iyang garbo,” padayag sa regional director dihang nahinabi sa Superbalita Cebu kagahapon, kinsa nidugang nga nasuko ang mayor human iyang gihagit nga mo-resign kon masulbad niya ang problema sa trapiko sa Mambaling area.

Si Francisco Ouano, pangu sa operations head sa Cebu City Transportation Office (CCTO), nikompirmar nga gimando ni Osmeña ang pagpa-deploy balik sa mga traffic enforcer sa Mambaling area.

Moabot sa 24 ka mga CCTO personnel ang nadestino sa dapit sa dan C. Padilla, dan Tagunol, dan Cabreros, dan Macopa, dan F. Llamas, dan Sabellano ug Punta Princesa areas.

Kagahapon, mga pulis gikan sa Mobile Patrol Group sa Cebu City Police Office ang nakita nga nimandar sa trapiko sa mga interseksyon duol sa underpass.

Si Vice Mayor Edgardo Labella niawhag sa duha ka kampo nga ipadaplin ang ilang kasungian alang sa kaayohan sa kinabag-an.

Bisan si Cebu Archbishop Jose Palma gikataho nga andam mopatunga aron mahilot ang duha ka magkasungi nga mga opisyal sa Sugbo.

Si Caindec nipasalig nga mohilom siya kon mohilom usab si Osmeña ug dili na manghilabot sa iyang pagpadagan sa LTO 7 ug sa iyang mga gimbuhaton isip regional director.

Siya nireklamo kon nganong giapil sa mayor ang iyang asawa nga wa man niya hilabti og apil si Konsehal Margot Osmeña ug si Miguel, ang asawa ug anak sa mayor.

Giangkon ni Caindec nga nagsugod ang bangi nila sa mayor tungod sa isyu sa registration sa mga motorsiklo ug human ang siyudad sunodsunod nga nanakop og mga motorsiklo nga nilapas sa counterflow.

Samtang giangkon sa mayor nga siya ang nagpabutang sa mga tarpaulin nga nagpakita sa hulagway ni Caindec tapad ni Presidential Assistant for the Visayas diin gibutang nga ang traffic management sa N. Bacalso Avenue kay iya na sa LTO 7.

Way enforcer

Bumper to bumper ang dagan sa mga sakyanan kagahapon sa Mambaling.

Hayan nisamot kini kagahapon kay way traffic enforceres gikan sa Cebu City Transportation Office (CCTO).

Dunay makitang pipila ka mga pulis ug mga kawani sa usa ka mall sa dapit nga nagpadagan sa trapiko.

“Sa pagka karon, walay Citom ako nakita. Ako nakita ganiha kay mga police nga naa sa Bonotores (Dalan Basak Mambaling Cebu City) kay naa man didto ang traffic kay ang agianan kay gamay kaayo. Mag-ilog sila kinsay muona og sulod mao nang naa sila didto,” matud ni Ronido Encina, usa ka empleyado.

Tungod sa nagka grabe nga trapiko naapektohan na ang mga establisemento sa dapit.

Usa kini sa rason nganung gipatabang ang ubang empleyado sa pagpadagan sa trapiko duol sa ilang establisemento. (SCG, Erwin Loregas-USJR Comm Intern)


VIEW COMMENTS