SECTIONS
Thursday August 16, 2018
SUPERBALITA CEBU

Pelikula sa Chiong sisters isalida na ugma sa Sugbo

MAKIT-AN na sa mga Sugboanon ang pelikula kalabot sa Chiong sisters, nga ipasalida sugod ugmang adlawa, apan mo-premier karong gabii sa mga tawo nga gipang-imbitar lang.

Kini human nitangkod og 21 ka tuig kagahapon ang hitabo ug paghusay sa kaso dinhi sa Sugbo nga gisumsumoman niadtong uwahing bahin sa dekada 90.

Ang inahan nila ni Marijoy ug Jacquiline Chiong nga si Thelma niingon nga hangtod karon naghamok gihapon sa ilang panumdoman ang nahitabo sa iyang duha ka mga anak nga babaye nga gidagit, gilugos ug gipatay.

Taliwa sa pagpasundayag sa “Jacqueline Comes Home” nga buksan sa publiko ugma, Miyerkules, ang pagtuki sa kaso gibuhi sa netizens pinaagi sa pagpasundayag sa documentary “Give up Tomorrow,”nga nag-asoy sa estorya sa habig ni Paco Larrañaga, usa sa mga suspek nga nakombikto.

Si Thelma niingon nga dihang si film director Carlo J. Caparas unang niduol kaniya aron mananghid kalabot sa paghimo og pelikula sa iyang duha ka mga anak, wa kini niya tugti kay nabalaka siya nga mabuhi ang masakit nga kasinatian sa iyang pamilya.

Niuyon siya human ang pipila sa mga netizen nipakatap og mga hungihong nga ang iyang anak nga si Jacqueline buhi pa.

Nasagmuyo siya human sa mga komentaryo sa social media kalabot sa kaso, nga naglakip sa pasangil sa kampo ni Larrañaga nga ang iyang bana nga si Dionsio, giingong nalambigit sa drugas.

Siya nagtuo nga ang documentary nga gihimo ni Marty Syjuco, kinsa nipala nga kabanay sa mga Larrañaga pinaagi sa kaminyuon, gitumong aron pagmugna og kalibog niadtong di pamilyar sa kaso.

Ang Korte Suprema mismo nikombikto sa tanang mga akusado, lakip na kang Larrañaga.

Ang tanang mga nakombikto gibalhug sa National Bilibid Prisons.

Apan si Larrañaga nga duha ang citizenship, Filipino ug Spanish, gibalhin pagbilanggo niadtong 2009 ngadto sa Soto del Real, Madrid, Spain. sa bilanggoan nga gitawag og Madrid Central Penitentiary.

Gisupak kini ni Thelma, apan napakyas siya sa iyang tinguha. (JKV sa Sunstar Cebu)


VIEW COMMENTS