SECTIONS
Wednesday August 15, 2018
SUPERBALITA CEBU

4 patay sa mga bangga

DEAD on the spot ang tulo ka lalake samtang tulo sab ang naangol human magbanga ang ilang motorsiklo nga gimaniho sa Barangay Lambusan, lungsod sa San Regemio, amihanang Sugbo niadtong Dominggo, alas 6:50 sa gabii.

Nianang buntag sa lungsod sa Argao, usa usab ka tawo ang namatay human mabangga ug mapasok ilawom sa bus ang iyang motorsiklo.

Ang mga nangamatay sa lungsod sa San Remegio giila sa kapulisan nga sila si Aljun Marianito, 25, taga Barangay Tambungon sa nahisgutang lungsod; Leo Hernaldo Rebaner, 37, minyo ug ang angkas niini nga si Ronelo Tipdas Vaplor, 38.

Samtang ang mga naangol mao sila si Julan Ponce Sumayang, 25, minyo, taga Barangay Libaong, San Regemio; Dexter Lex Guarin, 16, ulitawo ug Ken Aquinido, 24, ulitaw, puro mga lumolupyo sa Barangay Tambongon.

Matod sa imbestigador sa San Regemio Police Station nga si PO2 Jeffrey Lequin, si Hebaner nagmaniho sa iyang Rusi nga motorsiklo nga way suga ug ni-overtake sa usa ka Euro 125 nga motorsiklo nga gimaniho ni Sumayang.

Apan sa iyang pag overtake, nibangga siya sa motorsiklo nga gimaniho ni Marianito, kinsa nagmaniho sa kasugat nga direksyon hinungdan nga nanglabay sila sa ilang gisakyan.

Ang motorsiklo ni Sumayang naapil sa maong insidente human masaghiri sa nagbanga nga mga motorsiklo.

Ang Emergency Medical Services team sa San Remegio daling midala sa mga biktima ngadto sa Cebu Provincial Hospital sa dakbayan sa Bogo apan si Marianito, Rebaner ug Vaplor patay na pag-abot sa ospital.

Samtang sila si Sumayang, Guarin ug Aquinido naka-angkon og mga bali ug samad.

Ang mga motorsiklo sa biktima anaa karon sa San Remegio Police Station.

Bus

Sa lungsod sa Argao, usa ka nagmotorsiklo patay human nabangga ug napasok ilawom sa bus nga iyang gikasugat buntag niadtong Dominggo sa national highway sa Barangay Bulasa.

Sa report sa Argao police, si Jomar Rosal Carreon, hingkod, taga Dumlog, dakbayan sa Talisay, namatay.

Napasok si Carreon sa gikasugat nga Ceres Bus liner nga gimaniho ni Roderick Abuyador, taga Balisong, Manjuyod, Negros Oriental.

Si Carreon giingong kusog nga nakapadagan sa iyang motorsiklo padulong sa Dalaguete.

Ang Ceres bus paingon sa dakbayan sa Sugbo ni-overtake sa nag-unang Fuso trailer truck (450 GVS), gimaniho ni Mateo Belena Hernan Jr., taga Zone 6, Dakbayan sa Talisay.

Pagkakita sa driver sa Ceres nga dunay motorsiklo nga naghaguros padulong, kalit siya nga nihunong hinungdan sa pagkapilit sa motorsiklo sa atubangan ug napasok sa ilawom.


VIEW COMMENTS