GUBOT pas lukot.
Mao kini ang reaksiyon sa mga tawo sa dihang nahibaw-an nga dili diay mahinayon ang giingon nga pag-abri sa bag-ong gitukod nga Airport sa Panglao, Bohol karong bulan sa Agusto, 2018.
Gikabaniog na nga abrihan kini sa Agusto, human mobisita sa maong airport si DOTR Secretary Art Tugade og uban pang mga opisyales sa kagamhanan.
Gani, gibalita na kini sa makadaghan na nga panahon.
Apan naunsa bang pagka-unsaa nga nahibaw-an karong bag-o lang nga daghan pa man diay nga gitrabaho ang maong airport og imposible nga maabrihan kini karong bulan sa Agusto.
* * *
Kahinumdoman nga miadto sa airport sa Panglao si CabSec Jun Evasco sa miaging semana, kauban ang iyang mga sinaligan nga sila si Donald og Joy Sevilla, Norris Oculam og Alan Mangmang.
Samtang nakighinabi sa mga Hapon, nagkalingaw sab og kuha og mga hulagway sila si Joy Sevilla og Alan Mangmang og gi-video pa gyod ang uban pa nilang nakita.
Human niini, ila kining gi-upload sa Facebook og nang-gawas gilayon ang reaksiyon sa mga tawo.
* * *
Makita sa video og mga hulagway nga daghan pa kaayo og gitrabaho ang maong proyekto og imposible nga magamit kini sa bulan sa Agusto.
Gani, nanglingo-lingo og dugay nga wa makatubag ang mga Hapon nga apil sa pagtukod sa maong proyekto sa dihang gipangutana ni CabSec Evasco kon kanus-a man gyod mahuman ang maong proyekto.
Nagduda pa man gani ang mga Hapon kon mahuman ba kini sa bulan sa Disyembre karong tuiga tungod sa kadaghan pa sa angay nga buhaton.
Misulti ang usa sa gipangutana nga dunay duha ka opisyal sa kapitolyo nga kanunay nag-apura nga humanon gyod ang maong proyekto sa bulan sa Agusto karong tuiga.
Hapit na lang kada-adlaw magtawag aron ipugos gyod paghuman sa Agusto, matod pa.
Kinsa man kining duha nga apurado?
Nganong nagdali man sila nga mora’g dunay “deadline” nga gisunod?
* * *
Tungod niini, gipahimangnoan ang mga Hapon ni CabSec Jun Evasco nga dili angayan nga dali-dalion paghuman ang maong proyekto kay hayan makadaot na hinuon kini.
Gisultian niya ang mga Hapon nga bisan si PRRD dili gusto nga paspason ang paghuman sa maong proyekto kon maka-apekto kini sa integridad sa maong airport.
Basin mahilaw pa ang maong proyekto og makamugna hinuon og kadaot sa mga gumagamit niini, kon apikihon paghimo ang maong proyekto, dugang pa ni Evasco.
Wala pa gani sila kataod sa mga water sprinklers, hasta ang mga gipang-landscape nga mga Bermuda grass dako pa kaayo og kulang, matod sa kauban ni Evasco.
Hasta ang mga civil works sa runway og mga secondary road network daghan pa og kulang sa pagka-karon.
Lisod gyod nga ipamugos kini sa bulan sa Agusto, dugang pa sa kauban ni Evasco.
* * *
Makalingaw ang mga bayloay sa mga “posts” human mogawas ang video og mga hulagway sa Panglao Airport sa Facebook.
Sa usa ka panig, makita ang mga hulagway nga gi-post nila ni Joy Sevilla og Alan Mangmang. Sa pikas panig, makita ang mga nagbatikos kanila apan nag-gamit og mga alyas kay dili gusto nga mailhan ang ilang pagka-tawo.
Nasuko ang mga nagbatikos og nganong nanghilabot man sila sa proyekto sa kapitolyo; gani, nagpawas pa sila og mga malaw-ay nga mga “posts.”
Nahunong ang mga batikos sa dihang nailhan ang usa sa mga nagtakuban tungod sa managsama nila nga mga posts sa usa ka babayeng opisyal sa kapitolyo.
* * *
Unsa man kahay hinungdan nga nagdali man kining duha ka mga opisyal sa kapitolyo nga ipahuman gyod ang Panglao Airport karong bulan sa Agusto?
Duna ba silay giapas nga kalihokan aron maapil sa maong kalihokan ang “blessing” sa airport sa Panglao?
Wala ba sila mahadlok nga basin og mahugno ang poste o mahulog ang kisame sama sa nahitabo sa NAIA3 kaniadto?
Bisan gani ang mga electricals wala pa mapahiluna, labi na gayod ang mga kahimanan sa avionics og sa mga radar.
Nganong dili man ipakita ang tinuod nga hulagway sa airport, nganong ipagawas man nga hapit na mahuman nga dili man kini tinuod?
* * *
Dihay gibalita nga matod pa, contractor kuno ang gipasanginlan sa pagluthang-patay sa usa ka mayor.
Naikag ako sa maong balita kay nagtuo ako og taga-Bohol nga mayor ang gipasabot sa maong balita.
Dili man diay.
Matod pa sa akong amigo, contractor kuno ang usa sa gipasanginlan sa pagpatay sa mayor sa Bohol.
Gani, dunay negosyante nga naapil sa maong pagduda nga may kalabotan sa maong krimen.
Tinuod kaha kini?
Og dili pa tinuod, nganong “missing” na man sa nasod ang maong contractor, mieskapo ba?
Og ngano sab nga nag-sleepless nights na man ang maong negosyante?